Ka kaluar një muaj që nga zhdukja e dy shokëve në Sarandë, por autoritetet nuk kanë gjetur asnjë gjurmë se ku mund të jenë trupat e tyre, gjallë apo vdekur. Hetuesit dyshojnë se Leonard Thodhori, i njohur si “Koçolja” dhe Fatmir Sulovari, që mbante edhe mbiemrin Krasniqi, mund të jenë eliminuar fizikisht dhe groposur diku ku është e vështirë që të gjenden, nga një grup kriminal, për motive të larjes së hesapeve, prishje pazaresh apo edhe hakmarrje të mundshme, sikurse edhe pronësia. Kjo bazohet në faktin se për asnjë çast të humburit nuk do kishin humbur kontaktet me familjet e tyre dhe për koicidencë në të njëjtën kohë. Edhe ato pak gjurmë apo shenja të gjetura ishin të çuditshme, që përforcojnë dyshimin e një rrëmbimi. Pamjet filmike, makina e braktisur e Thodhorit, bisedat e fundit me miqtë, ilaçet e “Koçoles” brenda mjetit dhe shqetësimet e ditëve para zhdukjes, tregojnë se dy miqve u ka ndodhur diçka e keqe.
Edhe Altin Gjini, miku i Fatmir Sulovarit, ka shpjeguar se shpresat që ata të jenë gjallë pothuajse janë shuar. Madje beson dhe orienton hetuesit, se trupat e tyre mund të jenë afër zonës së Qafë-Botës, pasi sipas tij, personi me të cilin ka pasur konflikt ‘Koçolja’, jetonte afër asaj zone. “Miri ka hyrë në makinë me mirëbesim. Atje ku i kanë çuar, i kanë çuar po me mirëbesim dhe dyshohet se janë humbur në Qafë-Botë.
Aty është një kthesë që nga një anë shkon në Ksamil, nga ana tjetër për Qafë-Botë. Nga biseda me njërin që ka njohur dhe Koçolen, personi që ka pasur këtë konfliktin për pronën ka qenë nga kjo zonë”, tha Gjini. Në protestën që familjarët bënë një javë më parë tek Drejtoria e Përgjithshme e Policisë së Shtetit, u deklarua se nuk besonin shumë te pista e pronësisë, se nuk mund të vritet njeriu për 7 mln lekë të vjetra. Ata hodhën dyshime për nxitje të krimit nga një grup apo persona të tretë, për arsye ende të panjohura.
Paralelisht hetimet dhe kërkimet po vijojnë, teksa i ndjek vetë kryepolici Muhamet Rrumbullaku. Nga Kosova janë marrë qenë të stërvitur për kërkime trupash dhe forcat e kërkimit janë përqendruar në disa prej zonave ‘hot-sport’. Policia dyshon gjithashtu se dy personat e zhdukur janë ekzekutuar dhe groposur në një zonë pranë Ksamilit. “Policia shqiptare ka kërkuar ndihmë nga Policia e Kosovës, pasi ata kanë qenë të specializuar për të gjetur erën e trupit të njeriut. Aty po kërkohen trupat e viktimave dhe është e vështirë të jetë kryer shkrirja e trupave në acid. Ka pasur dhe kërkime nga pala shqiptare por pa rezultat, dhe kjo është arsyeja pse ka hyrë në lojë Kosova”, thanë burime nga policia vendore. Edhe vetë familjarët janë angazhuar që prej fillimit me kërkime në terren, duke ndjekur shenjat dhe gjurmët, si dhe dëshmitë e banorëve të zonës, por pa asnjë sukses deri tani.
