Arrestohet autori i plagosjes së trefishtë, të ndodhur mesditën e sotme në Shkodër, pranë Poliklinikës, në ambientet e një lokali. Në pranga ka rënë Aldo Hasani. “Menjëherë pas ngjarjes së ndodhur mesditën e sotme, në lagjen “Qemal Stafa”, Shkodër, ku shtetasi A. H., pas një konflikti për motive të dobëta, plagosi me thikë tre bashkëmoshatarët e tij dhe u largua, shërbimet e Komisariatit të Policisë Shkodër, në bashkëpunim me Forcën e Posaçme Shqiponja të DVP Shkodër, janë vënë në ndjekje të autorit dhe kanë ushtruar kontrolle të shumta në ambiente të ndryshme, në akse rrugore dhe në lagjet e qytetit të Shkodrës. Për shkak të presionit të Policisë dhe falë negociatave me familjarët e shtetasit A. H., u bë e mundur që rreth orës 20:00, ky shtetas të vetëdorëzohej në Komisariatin e Policisë Shkodër, për veprime të mëtejshme proceduriale”, thuhet në njoftimin zyrtar të policisë vendore. Hasani akuzohet se në një sherr të dyshuar për vajza, qëlloi me thikë tre të miturit; K. H., E. T. dhe Xh. P., 15-17 vjeç dhe më pas u largua, teksa do akuzohet për “plagosja e rëndë me dashje”, njofton Policia.