Kundërshtime, kaos dhe grushte në futbollin brazilian. Flamengo u përball me Atletico MG në transfertë, sfidë e javës së 17-të në Brazileirao. Kuqezinjtë fituan 1-2 kundër skuadrës së Scolarit. Sukses që erdhi falë golave të Giorgian de Arrascaeta dhe Wesley në dhjetë minutat e fundit.
Sulmuesi Pedro, i cili provoi një aventurë në Serie A me Fiorentinën, e nisi ndeshjen nga stoli për Flamengon. Pasi argjentinasi Sampaoli nuk e preferoi si titullar. Ndërkohë që 26-vjeçari u ftua të kryente nxemjen bashkë me disa shokë të stolit, ai refuzoi.
Pasi mendonte se nuk do të aktivizohej nga Sampaoli. Të cilit i kishte mbetur vetëm një zëvendësim për të kryer. Pedro nuk vijoi përgatitjet dhe zgjodhi të qëndronte në stol deri në fundin e ndeshjes. I mërzitur për faktin pse nuk po luante dhe i bindur se trajneri nuk do e përdorte si “kartën” e fundit gjatë takimit.
Veprimi i goleadorit ka tërbuar Pablo Fernandez, përgatitësin atletik të Flamengos. Sipas raportimeve nga shtypi brazilian, ky i fundit ka goditur me grushte Pedron në dhomat e zhveshjes. Pasi ndeshja kishte përfunduar.
Lojtarët e tjerë të Flamengos kanë mbajtur anën e sulmuesit, teksa stafi teknik i Flamengos, me Sampaolin në krye, kanë dhënë versionet e tyre në komisariatin e Belo Horizontes pas denoncimit të lojtarit të kombëtares braziliane.
Pedro ishte një nga sulmuesit e ftuar nga ish-trajneri Tite si pjesë e pesë herë Kampionëve të Botës në Kupën e Botës Katar 2022.