Sezoni veror shoqërohet me nevoja më të larta për gjak, jo vetëm në ndihmë të pacientëve talasemikë, apo sëmundjeve të tjera, por edhe aksidenteve të shumta që ndodhin.
E ndërsa ekspertët e shëndetit publik apelojnë për shtim të dhurimeve vullnetare, tashmë çdokush prej nesh në vetëm pak sekonda mund të planifikojë ditën dhe orën se kur mund të paraqitet pranë qendrave të gjakut për të bërë dhurimin.
E gjithë procedura e konfirmimit mund të bëhet në portalin online, e-albania.
“Platforma online e dhurimit vullnetar të gjakut A, B, O, ju jep mundësi që, përmes aplikimit në e-Albania, të rezervoni ditën dhe orën e dhurimit, e nëse jeni një grup punonjësish, duke aplikuar, vjen tek ju ekipi i Qendrës Kombëtare të Transfuzionit të Gjakut. Të forcojmë zinxhirin e solidaritetit për dhurimin vullnetar të gjakut, për të përmbushur nevojën jetësore për të sëmurët me talasemi dhe të gjithë qytetarët që kanë nevojë për gjak”, konfirmon ministrja e Shëndetësisë dhe Mbrojtjes Sociale, Ogerta Manastirli nëpërmjet një postimi të bërë në rrjetin social Facebook.
Shërbimi elektronik “Rezervim për dhurim gjaku për individë dhe subjekte” i mundëson qytetarëve dhe subjekteve, të cilët dëshirojnë të dhurojnë gjak, të aplikojnë online për të rezervuar orarin për të kryer procedurën e dhurimit të gjakut pranë Bankës së Gjakut të përzgjedhur.
Për rezervimin e këtij shërbimi nuk nevojitet dokumentacion shoqërues.
Hapat e procedurës
– Identifikohuni si qytetar ose subjekt në portalin e-Albania.
– Zgjidhni shërbimin “Rezervim për dhurim gjaku për individë dhe subjekte”.
– Klikoni butonin “Përdor”.
– Plotësoni të dhënat e kërkuara në formular lidhur me orarin, datën dhe përzgjidhni Bankën e Gjakut;
– Klikoni butonin “Dërgo” për finalizimin e aplikimit.
– Pas dërgimit të aplikimit, aplikanti lajmërohet elektronikisht nëpërmjet e-albania.
p.k\dita
