Një 58-vjeçar nga Kosova u vu nën akuzë, pasi kishte fshehur në makinë dhe nuk deklaroi 11790 euro cash teksa po kalonte pikën kufitare të Muriqanit. Burime policore thanë se i dyshuari është 58-vjeçari me inicialet N. F., ndaj të cilit rëndon aktualisht vepra penale e “mosdeklarimit në kufi të të hollave dhe i sendeve me vlerë”. “Shërbimet e Policisë Kufitare të PKK Muriqan, bazuar në analizën e riskut, kanë intensifikuar kontrollet me qëllim parandalimin, evidentimin dhe goditjen e paligjshmërive kufitare.
Në këtë kuadër, në hyrje të RSH-së, kanë kaluar në vijën e dytë, për kontroll më të imtësishëm, automjetin me drejtues të dyshuarin, ku u sekuestrua edhe sasia e valutës”, thanë burimet zyrtare. Policia e Shkodrës ia referoi Prokurorisë dosjen ndaj kosovarit, për veprime të mëtejshme.
