“Po përforcojmë mbrojtjen ndaj sulmeve kibernetike”, Rama takim me përfaqësues të start up-eve

Kryeministri Edi Rama ditën e sotme ka zhvilluar një takim me përfaqësues të teknologjisë, inovacionit, dhe start up-eve.

Ky takim i posaçëm mbi rrugën e bërë dhe sfidat për Shqipërinë 2030 në Bashkimin Europian u mbajt në Berat.

Rama gjatë fjalës së tij u shpreh se qeveria do të jetë partnerë i drejtpërdrejtë me këtë sektor.

Sipas tij me vënien në dispozicion të mjeteve që ka qevëria mund të krijohen edhe më shumë hapërira.

Rama shtoi se duhet të trajtohen problematikat e kësaj bote të re që është krijuar në vendin tonë.  Ai u shpreh se sektori publik ka progres.

Rama nga ana tjetër u shpreh se është i vetëdijshëm se ka boshllëqe teksa theksoi se kjo më së shumti shihet te sektori privat.

Kryeministri tha se ky sektor nuk po ecën në të njëjtën ritëm me atë publik.

Rama gjithashtu shtroi idenë e krijimit të një Këshilli ose Forumi ku sipas tij një herë në vit të mblidhen dhe të diskutojnë.

Gjithashtu ai bëri me dije ndaj institucioneve shtetërore ka çdo ditë sulme kibernetike nga Irani.

“Një pjesë e juaja janë të lidhur ngushtë me tregun dhe me aktorë domethënës në tregun ndërkombëtar, kjo do të thotë që janë të lidhur edhe me punën, produkte të cilat nëse janë të vlefshme dhe u shërbejnë situatave të administrimit publik jashtë Shqipërisë, nuk kanë arsye përse të mos shërbejnë dhe brenda Shqipërisë. Kemi nevojë për çdo gjë në këtë aspekt, dhe duke mos e njohur si duhet sektorin nga brenda i referohemi çfarë njohim dhe dimë nga vitrina globale e sektorit. Kemi të gjitha arsyet të besojmë që së bashku mund edhe të angazhohemi për produkte të dedikuara që nuk janë ekzistente, por që mund të krijohen bashkërisht.

Në vend se të shkojmë të paguajmë për produkte ekzistuese që vijnë nga jashtë. Në këtë aspekt, nuk duhet ta neglizhojmë në asnjë mënyrë çështjen e sovranitetit që është kthyer me shumë forcë në tryezën e diskutimit në të gjitha vendit, ku tendenca për tu pavarësuar nga shërbimet globale është gjithnjë e më fortë në funksion të mbrojtjes nga boshllëqet ku mund të penetrojnë aktorë me qëllime të këqija ndaj vendit përmes sulmeve kibernetike. 

Unë jam shumë krenar që kemi bërë progres. Kemi Cloud tonë në shërbimet tona digjitale, jemi të pavarur. Por jam i vetëdijshëm sa boshllëqe kemi, sidomos në sektorin privat. Ndërkohë që po forcojmë mbrojtjen tonë në sektorin publik, sektori privat nuk po ecën me të njëjtin ritëm. Mund të kemi një ofertë për sektorin privat.

Ajo që do ju kërkoja, është që të jeni totalisht të hapur. Ne ju kemi ftuar që të na flisni shumë hapur. Ju e keni edhe lirinë të thoni atë që doni, që mendoni, nuk keni varësi nga ne. Mendoj që ia vlen të kemi një Këshill, një forum, ku të mblidhemi 1 herë në vit, për të diskutuar mbi çështjen dhe mbi të rejat, qofshin për mirë, qofshin të keq”, tha Rama.

Rama u shpreh se nuk mund të lejohen që të sulmohen banka apo spitale private.

Ai ka bërë parashikimet për të ardhmen. Rama u shpreh se së shpejti mund të ketë qeveri dhe ministra nga inteligjenca artificiale.

Ai nuk nguroi të shkëmbente batuta teksa theksoi se një ministri AI nuk do të ketë asnjë kushëri për të futur në punë.

“Shumë shpejt mund të vijë dita që qeverinë mund ta kesh AI. Shumë shpejt mund të vijë dita që ministin X mund ta kesh Ai. S’ka asnjë kushëri për të futur në punë, s’ka as interesa të asnjë natyre që të prishë proceset. Nuk po them se ky është synimi ynë, megjithëse me shumë kënaqësi do ta merrnim përsipër, por është e pafundme kjo botë”, tha ai.

Rama vijoi duke shtuar se inteligjenca nuk ka interesa që të prishë proceset.

j.l./ dita