Dy oficerë të policisë bullgare u vranë mëngjesin e së enjtes teksa u përpoqën të ndalonin një autobus me emigrantë që kishin hyrë ilegalisht në vend.
Lajmi u bë i ditur nga një zyrtar i lartë i Ministrisë së Brendshme, i cili dha detaje mbi ngjarje ne rëndë.
Incidenti ndodhi në orën 5 të mëngjesit në qytetin Burgas, ku u pikas autobusi m targa turke, i cili po transportonte 47 emigrantë, kombësia e të cilëve nuk bëhet e ditur.
Shoferi refuzoi të ndalonte në dy pika të kontrollit të policisë dhe efektivët iu vunë nga pas. Kur autobusi kishte hyrë në një zonë të banuar, oficerët e policisë ndaluan automjetin e tyre përballë rrugës që ndodhej përpara tij. Autobusi përplasi automjetin e policisë dhe më pas kaloi sipër tij përpara se të përplasej me një stacion autobusi.
Dy efektivët që ndodheshin në makinë mbetën të vrarë në vendngjarje, ndërsa nuk pati të lënduar të tjerë. Deri më tani, nuk është ngritur asnjë akuzë kundër shoferit, por prokurori i qarkut Georgi Chinev i quajti veprimet e shoferit një “veprim të vetëdijshëm dhe të qëllimshëm”.
Bullgaria, një vend ballkanik me 7 milionë banorë, ndodhet në një prej rrugëve kryesore për emigrantët nga Lindja e Mesme dhe Afganistani për në Evropë. Vetëm një numër i vogël i tyre planifikojnë të qëndrojnë në anëtarin më të varfër të BE-së, duke përdorur Bullgarinë si një korridor tranziti në rrugën e tyre drejt perëndimit.
a.m/dita
