Tre persona janë arrestuar nga policia e Sarandës, në tentativë për të transportuar 13 emigrantë të paligjshëm drejt vendeve të Bashkimit Europian, kundrejt pagesës.
Në pranga kanë rënë Eduart Kërçiku, Elion Bakalli, Bernard Karaji, ndërsa është shpallur në kërkim bashkëpunëtori i tyre shtetasi Leonard Celiku, i cili lëvizte me automjetin e tij para 3 automjeteve të mbushur me emigrantë, për të monitoruar rrugën për prani të policisë.
Arrestimi i tyre është bërë në aksin rrugor Gjirokastër-Sarandë, në vendin e quajtur “Ish-miniera e Kripës”, Finiq. 26-vjeçari Eduard Kërçiku është person me precedentë të mëparshëm penalë, ndaj të cilit gjykata kishte caktuar masën ‘detyrim paraqitjeje’.
Bashkëpunëtori i tyre, Leonard Celiku, i cili monitoronte rrugën, sapo ka parë praninë e policisë, ka braktisur automjetin dhe ia ka mbathur nga vendi i ngjarjes. Vijojnë kërkimet për kapjen e tij dhe zbardhjen e plotë të rrethanave të ngjarjes.
