Trafikimi i klandestinëve po bëhet një nga bizneset fitimprurëse ilegale në Shqipëri, me shifra që shkojnë deri në 1 mijë euro për person. Tentativa për të kaluar 5 emigrantë të paligjshëm të kufirit ka vënë në pranga 35-vjeçarin Gani Mollaymeri. Ai ishte duke lëvizur me automjet në aksin rrugor Korçë-Pogradec, pranë vendit të quajtur “Qafë-Plloçë”, ku konstatoi se po ndiqej nga policia. Ndonëse uniformat blu e sinjalizuan që të ndalonte, i dyshuari tentoi të largohej me shpejtësi por u kap.
Gjatë kontrollit në automjetin tip “Benz” me të cilin lëvizte 35-vjeçari me banim në Durrës, u gjetën 5 emigrantë të paligjshëm. Nga tërësia e veprimeve hetimore dhe provat e siguruara, rezultoi se Mollaymeri do t’i transportonte emigrantët kundrejt pagesës, me qëllim që të kalonin në mënyrë të paligjshme drejt vendeve të BE-së.
Në cilësinë e provës materiale u sekuestruan automjeti, një aparat celular dhe një shumë parash. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
