Burgjet përfshihen nga ndryshime të reja ligjore. Ministria e Drejtësisë është dorëzuar para vakancave të krijuara në radhët e Policisë së Burgjeve, duke u tërhequr nga kriteri i moshës 35 vjeç për t’u bërë gardian. Ministri Ulsi Manja, njoftoi dje në dalje për mediat, se kriteri që është konsideruar si diskriminues, tashmë është hequr. Ministria parashikon të rikthejë edhe të vetë larguarit.
“Sot kaluam disa ndryshime në ligjin për Policinë e Burgjeve. Ne u japim zgjidhje disa problematike, si vakancave. Kemi një numër shumë të madh vakancash. Heqim kufirin e moshës deri në 35-vjeç për t’u bërë pjesë e Policisë së Burgjeve. Vendosja e kufizimeve moshore në ligj është edhe diskriminues. Gjithashtu hapim një dritare për pranim në policinë e burgjeve të të larguarve, apo edhe që vijnë nga struktura të tjera ushtarake apo policore që plotësojnë kushtet.
Nëse deri tani policët e burgjeve kanë marrë armën në shtëpi, tashmë jashtë orarit ajo nuk do të lejohet të merret më me vete”, tha Manja.
Më tej ministri shpjegoi edhe rolin e gradave. “Kemi rregulluar edhe sistemin e gradave, të ulëta dhe të mesme. Do të vendosim një sistem karriere në Policinë e Burgjeve. Ndryshimi i fundit ka të bëjë me përdorimin dhe llojin e armëve. Punonjësve të Policisë së Burgjeve nuk do t’i lejohet përdorimi jashtë orarit të punës, si dhe rregullat për përdorimin e armëve neuro-neutralizuese”, tha ai.
