Një 52 vjeçar ka përfunduar në prangat e policisë së Krujës për kultivim të bimëve narkotike në Kodër-Mazhë. Në vijim të aksionit të koduar “Territor i pastër”, policia ka zbuluar në këtë zonë 500 bimë kanabis të kultivuara në afërsi të një banese, të cilat më pas janë asgjësuar me anë të djegies.
“Sipas Policisë “Si rezultat i kontrollit të ushtruar në kuadër të fazës së 16-të të megaoperacionit policor antikanabis të koduar “Territor i pastër”, në afërsi të banesës së shtetasit A. H., në Kodër-Mazhë, Krujë, u gjetën të kultivuara 500 bimë të dyshuara narkotike cannabis sativa, të cilat u asgjësuan me anë të djegies. Në vijim të veprimeve u bë arrestimi në flagrancë i shtetasit A. H., 52 vjeç, banues në Mazhë e Vogël, Krujë””, thuhet në njoftimin e policisë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
Më herët, si rezultat i fazave të tjera të këtij megaoperacioni, janë gjetur dhe asgjësuar 8753 bimë të dyshuara narkotike kanabis.
Megaoperacioni policor antikanabis i koduar “Territor i pastër”, vijon.
p.k\dita
