Për personin në kërkim për vrasje, Florenc Çapja, policia e Elbasanit kishte informacion se ishte kthyer në Shqipëri. Ajo ndërmori një aksion për arrestimin e tij në biznesin e babait, por pa sukses. I shumëkërkuari prej 12 korrikut të vitit të kaluar rezulton qytetar i lirë në Emiratet e Bashkuara Arabe, me leje qëndrimi, madje edhe i punësuar.
Avokati i tij mbrojtës, Neshat Fana tha më 28 Korrik të vitit të kaluar se Florenc Çapja ka qëndruar për një periudhë kohe nën mbikëqyrje në një banesë në Dubai, por më pas ishte lënë i lirë.
Çapja pretendonte sipas një e-maili dërguar Gjykatës Kundër Korrupsionit dhe Krimit të Organizuar se nuk ka janë respektuar procedurat për hetimin që po zhvillohet ndaj tij në Shqipëri.
Florenc Çapja është në kërkim nga drejtësia shqiptare pasi akuzohet si porositës për vrasjen e at e bir, Nezir dhe Gentian Beqiri, ngjarje kjo e ndodhur në Elbasan në vitin 2012. Lidhur me këtë ngjarja është vënë në pranga xhaxhai i tij Ardian Çapja.
Për vrasjen e Gentian dhe Nezir Beqirit janë arrestuar edhe Jorgo Leku alias Olsi Leka, i cili u prangos në Athinë më 11 Tetor 2020; Etien Cani i cili u ekstradua nga Italia në Shqipëri po në vitin 2020 si dhe Ervis Bardhi.
Gentian Beqiri u qëllua për vdekje më 15 Gusht 2012 në banesën e tij kur ndodhej në ruajtje nga policia në gjendjen e “arrestit të shtëpisë”. Beqiri ishte dënuar si i implikuar në vrasjen e biznesmenit Sokol Çapja, në vitin 2005. Po atë ditë u dhunua edhe babai i tij Nezir Beqiri i cili ndërroi jetë.
j.l./ dita
