Ndonëse nuk dihen ende autorët, policia e Krujës ka goditur që në fazën fillestare, një tjetër rast të tentativës për të kultivuar bimë narkotike.
Gjatë kontrolleve intensive në zona të pyllëzuara të qarkut, për parandalimin dhe goditjen e kësaj veprimtarie kriminale, janë gjendur dhe sekuestruar 782 kubikë, të mbushur me dhé, si dhe fara të dyshuara narkotike kanabisi, të cilat ishin në proces mbirjeje.
“Skuadrat policore të ngritura në kuadër të operacionit “Territor i pastër”, konstatuan në një territor të fshatit Mafsheq, Krujë, një serë të improvizuar, brenda së cilës u gjetën 782 kubikë, të mbushur me dhé dhe fara të dyshuara narkotike kanabisi, në proces mbirjeje. Kubikët u sekuestruan në cilësinë e provës materiale. Komisariati i Policisë Krujë dhe Drejtoria Vendore e Policisë Durrës, në bashkëpunim me Prokurorinë pranë Gjykatës së Rrethit Gjyqësor Krujë, vijojnë veprimet e thelluara hetimore, për identifikimin dhe kapjen e autorëve të kësaj veprimtarie kriminale”, bëjnë me dije autoritetet e policisë.
Policia bën me dije se do të vijojnë kontrollet në të gjithë territorin e rrethit, kundër kultivimit të bimëve narkotike.
Materialet procedurale i kaluan Prokurorisë pranë Gjykatës së Rrethit Gjyqësor Krujë, për veprime të mëtejshme, për veprën penale “Kultivimi i bimëve narkotike”.
p.k\dita
