AktualitetKronikeKryesore

Prag tragjedie në Qafë-Thanë, vetura përplaset me autobusin dhe shpërthen në flakë, 6 të plagosur (Fotot)

Aksident dramatik dhe prag tragjedie në Qafë-Thanë. Një autobus është përplasur minuta më parë me një mjet të vogël në aksin Prrenjas-Pogradec. Si pasojë e aksidentit, ka shpërthyer makina e vogël, ndërsa raportohet për disa të plagosur.

Ambulanca e spitalit të Prrenjasit ka marrë disa persona të plagosur rëndë, ndërsa është nisur edhe ambulanca e Librazhdit drejt vendngjarjes. Për momentin ngjarja është nën investigim. Policia vendore ndodhet në vendngjarje, teksa po pyeten të mbijetuarit. Paraprakisht dyshohet për ndonjë parakalim dhe shpejtësi tej normave, por do priten rezultatet e ekspertimit auto-teknik. Besohet se vetura ka qenë me gaz dhe përplasja solli dëmtimin e motorit dhe më tej shpërthimin.

Nga pamjet shihet se makina është shkrumbuar totalisht. Sipas policisë, autobusi është përplasur me mjetin tip “Benz”, i cili më pas është përfshirë nga flakët. Për pasojë janë dëmtuar drejtuesi i automjetit dhe 5 pasagjerët që udhëtonin me të, të cilët janë transportuar menjëherë në spital për të marrë ndihmën e duhur mjekësore.”Rreth orës 16:20, në aksin rrugor Qafë Thanë – Prrenjas, autobusi që drejtohej nga shtetasi I. A., 51 vjeç, me drejtim lëvizjeje Pogradec-Prrenjas, është përplasur me automjetin tip “Benz”, që drejtohej nga shtetasi I. M., 28 vjeç, me drejtim lëvizjeje nga Prrenjasi në drejtim të Pogradecit. Si pasojë e aksidentit automjeti tip “Benz” është përfshirë nga flakët dhe për pasojë janë dëmtuar drejtuesi i automjetit dhe 5 pasagjerët që udhëtonin me të, të cilët janë transportuar menjëherë në spital, për ndihmë mjekësore”, thuhet në njoftimin zyrtar.

Gjithashtu theksohet se janë shkaktuar vetëm dëme materiale në autobusin që drejtohej nga shtetasi I. A. Në vendngjarje ndodhen shërbimet e Policisë Rrugore të DVP Elbasan dhe grupi hetimor, i cili vijon punën për zbardhjen e rrethanave të aksidentit.

 

Shpërndaje këtë artikull