Në gjyqin për aferën Partizani pritej dëshmia e dy personazheve të rëndësishëm të dosjes, ish ministri i Sporteve Ylli Pango, dhe ish-drejtoresha e këtij dikasteri, Violeta Shqevi. Ata ishin thirrur dëshmitarë nga Prokuroria e Posaçme (SPAK), që synon të zbardhë se si të dy u vunë në dispozicion të urdhrave të Berishës për të bërë gjithçka për privatizimin e “Partizanit”, që dhëndri i Berishës, Malltezi të ndërtonte 19 kulla dhe të përfitonte minimalisht 5.4 milionë euro.
Por, seanca dështoi pasi avokati i ndërtuesit Fatmir Bektashi nuk u paraqit në gjyq. Kjo bëri që Prokuroria e Posaçme të kërkonte shtyrjen e seancës, kërkesë që iu pranua nga trupi gjykues duke caktuar gjyqin e radhës më datë 8 qershor. Bashkë me Pangon dhe Shqevin, GJKKO vendosi të thërrasë në seancën e radhës edhe 4 dëshmitarë të tjerë, ish-presidentin e klubit Paro Laçi, ish-ministrin e Energjetikës, Genc Ruli, Tetis Lubonja, përgjegjëse në sektorin juridik te Agjencia e Kthimit dhe Kompensimit të pronave, si edhe Altin Ceni, specialist po në këtë agjenci.
Ish-ministri Pango pretendoi në sallë se “nuk ka kohë për tu paraqitur” më 8 qershor dhe Gjykata deklaroi se nëse nuk do të shkojë, atëherë për Pangon do të caktohet një tjetër datë që të dëshmojë. Pjesa më e rëndësishme, që pritet të marrë vëmendjen në gjyq, është ndryshimi i ligjit për “Sportin” në vitin 2008, i cili lejoi privatizimin e ambienteve sportive për ish pronarët, madje duke lejuar edhe ndryshimin e destinacionit. Pra edhe ndërtimin e kullave.
Fillimisht ligji nuk lejonte privatizimin dhe dhënien me koncesion, në të dyja rastet pa iu ndryshuar destinacioni. Pango dhe dikasteri që ai drejtonte e ndryshuan ligjin, duke e ndaluar privatizimin, por disa muaj më vonë me ndërhyrje të Berishës bëhet një tjetër ndryshim ligjor. Tashmë do të lejohej jo vetëm dhënia me koncesion por edhe privatizimi i plotë në favor të pronarëve, madje duke i dhënë të drejtën atyre që të ndryshonin destinacionin. Ashtu siç në fakt ndodhi në ambientet e ish klubit Partizani, ndërtimi i dhjetërave kullave.
GJKKO nuk ka arritur të marrë ende dëshminë e ish-drejtorit të klubit, Isa Tare, për të cilin familja sot dorëzoi edhe kartelën mjekësore me të cilën pretendojnë se vuan nga demenca. SPAK ka kërkuar që të merret si bazë dëshmia që Tare ka dhënë në prokurori, por GJKKO s’ka marrë vendim. Tare është një nga dëshmitë që do pritej me interes, pasi ai ka deklaruar se atij iu premtua një apartament që të mos kundërshtonte privatizimin.
Një tjetër dëshmi e fortë është ajo e Paro Laçi, për të cilin në dosjen e SPAK thuhet se ka dëshmuar se i është ofruar një pazar nga njerëzit e Berishës për të liruar ambientet e klubit. Në intervista televizive për Report Tv ai ka deklaruar disa herë që është kërcënuar nga Sali Berisha dhe Jamarbër Malltezi, e madje i kanë ofruar edhe 500 mijë euro që të mbyllte gojën për këtë çështje.
