Universiteti nuk është më gjithmonë në fokus kur flasim për tregun e punës.
Në fakt, katër (ose më shumë) vitet e një diplome – plus një master tjetër – nuk garantojnë përherë stabilitet dhe nuk ju vendosin në punë të menjëhershme. Kanë ikur ato kohë. Por ata që ia dalin të kenë edhe punën edhe diplomën, sigurisht paguhen mirë.
Ndaj duket çudi kur dëgjon për një pozicion që është me të vërtetë fitimprurës, por nuk kërkon që ju të keni një diplomë universitare – megjithëse kërkon kritere të tjera.
Si kontrollor i trafikut ajror, mund të fitoni mesatarisht deri në 100,000 euro në vit.
Çfarë bën kontrollori i trafikut ajror?
Ai ofron një shërbim ATC (Air Traffic Control) dhe është përgjegjës për drejtimin efektiv të trafikut në mënyrë të sigurt si në ajër, ashtu edhe në aeroporte. Ai është përgjegjës për informimin e pilotit dhe paralajmërimin e tij me udhëzimet e nevojshme.
Sa paguhet?
Edhe pse mesatarja vjetore është deri në 100,000 euro, kjo shifër nuk është e përhershme apo për të gjithë kontrollorët. Ka faktorë që e rrisin ose e ulin këtë numër si orët e punës jashtë orarit zyrtar, përvoja (kontrolluesit me më shumë vite përvojë zakonisht marrin paga më të larta) apo edhe zona ku kryhet puna. Aeroporte më të mëdha, më shumë trafik dhe përgjegjësi, kanë pagat më të larta.
Për çfarë ka nevojë?
Një licencë specifike dhe një nivel i lartë i gjuhës angleze. Përveç kësaj, është gjithmonë mirë që të kemi trajnim shtesë që përforcon aftësitë tona. Është e rëndësishme të dini se ky pozicion është përgjegjësi e madhe dhe të përzgjedhurit për këtë punë zakonisht kanë një kapacitet më të madh për perceptim dhe projeksion hapësinor.
