Në një intervistë për Report Tv, kryetari i Bashkisë se Tiranes, Erion Veliaj u shpreh se Tirana do të bëhet Tel-Aviv i Ballkanit.
“Ne kemi disa projekte në zhvillim. Piramida është drejt përfundimit dhe do jetë një nga super veprat në Tiranë. Një investim i jashtëzakonshëm i qeverisë shqiptare, fondit Shqiptaro-Amerikan për Zhvillim, Bashkisë së Tiranës.
Do vazhdojmë projektet për fëmijë. I kemi dhënë qytetit disa hapësira shumë shumë dinjitoze,Liqeni Tiranës, Liqeni Farkës, kopshti Zoologjik, Bulevardi i Ri, Pazari, Kalaja. Do vazhdojmë me Kopshtin Botanik.
Do përfundojmë dy terminalet. Ka mbaruar ai i Lundrës që do të hapet këto ditë, vazhdojmë me terminalin tek kthesa e Kamzës. Vijon puna për kampusin e Qytetit Studenti në Tiranë. Ka përfunduar ai në Kodër-Kamëz tek Mjekësia dhe tek Inxhinieria.
Po punohet për përfundimin e Unazës së Tiranës. Bizhuja e re e qytetit do të jetë Teatri i ri Kombëtar që sapo ka filluar punimet, një super punë e arkitekturës moderne nga Bjarke Ingels”, tha Veliaj
Ai u ndal edhe te projektet e reja për Tiranën.
“Në Bulevardin e Ri do çojmë disa nga gjykatat dhe disa nga institucionet e reja të drejtësisë. Gjithashtu Tatimet, Doganën, Hipotekën duam t’i çojmë te 5 Maj.
Ne do realizojmë Tiranën policentrike, të hapur në të gjithë aksin e Bulevardit të Ri ashtu siç është hapur edhe në gjithë aksin e Lanës. Do ketë një tjetër shesh fundor në skajin e Bulevardit të Ri.
Pra, Bulevardi fillon me sheshin “Nënë Tereza” në mes është “Sheshi Skënderbej” dhe në fund, aty ku Bulevardi i Ri takohet me Lumin e Tiranës, do bëjmë sheshin e tretë.
Do përfundojmë paketën e shkollave. Do kemi 8 shkolla të reja, 2 në zonën e Astirit në njësinë 7, 2 në anën e Yzberishtit dhe të njësisë 14, një shkollë pranë Kopshtit Botanik tek Liqeni i Thatë, do kemi 2 shkolla të reja në zonën e Saukut dhe një tek ish-spitali i Arabit. Kjo është sfida jonë për të shmangur mësimin me dy turne në arsimin publik”, sqaroi kryebashkiaku i Tiranës.
