Gjashtë burra të gjallë ndajnë një lidhje gjenetike me Leonardo da Vinçin përmes linjës mashkullore.
Megjithëse Leonardo nuk pati fëmijë, studiuesit Alessandro Vezzosi dhe Agnese Sabato kanë ndjekur gjenealogjinë e familjes së tij për më shumë se 30 vjet, duke ndërtuar një pemë familjare që shtrihet në 21 breza dhe përfshin mbi 400 individë.
Ata identifikuan 15 pasardhës të gjallë në linjën mashkullore, dhe gjashtë prej tyre iu nënshtruan analizave të ADN-së. Rezultatet treguan se këta burra ndajnë segmente të përbashkëta të kromozomit Y, i cili transmetohet pothuajse i pandryshuar nga babai te djali, duke konfirmuar vazhdimësinë gjenetike të linjës mashkullore të familjes Da Vinçi për të paktën 15 breza.
Ky zbulim është një hap i rëndësishëm në projektin “Leonardo da Vinci DNA Project”, i cili synon të rindërtojë profilin gjenetik të Leonardos për të kuptuar më mirë trashëgiminë e tij biologjike dhe për të verifikuar autenticitetin e mbetjeve të supozuara të tij.
Aktualisht, po kryhen gërmime arkeologjike në Kishën e Santa Croce në Vinci, ku besohet se janë varrosur disa nga të afërmit e Leonardos, për të krahasuar ADN-në e tyre me atë të pasardhësve të gjallë – raporton gazeta Dita duke cituar mediat italiane.
Ky projekt mund të ndihmojë gjithashtu në analizimin e objekteve të lidhura me Leonardon, si dorëshkrimet apo veprat e artit, për të identifikuar gjurmë biologjike që mund të ndihmojnë në vërtetimin e origjinës së tyre. Nëse ADN-ja e Leonardos mund të rindërtohet me sukses, ajo mund të ofrojë njohuri të reja mbi prejardhjen, karakteristikat fizike dhe ndoshta edhe mbi aftësitë e tij të jashtëzakonshme.
o.p. / dita
