Hetimet e thelluara të Prokurorisë së Lezhës zbardhin rrethana e fakte të reja për ngjarjen e 19 prillit. Bëhet fjalë për të dyshuarën Harriet Bridgeman, për të cilën policia shqiptare ka dyshime se ishte pjesë e grupit të vëzhgimit, që çoi në vrasjen e biznesmenit Ardian Nikulaj, brenda lokalit të tij “Coral”, në Shëngjin.
‘Top Channel’ ka siguar dëshminë e britanikes 27-vjeçare, pas arrestimit mesditën e të dielës së shkuar.
Harriet Bridgeman është e papunë, nënë e një fëmije 8 vjeç, që u la e lirë me kusht nga gjykata, pasi babai i saj ofroi si garanci 20.000 stërlina. Bridgeman, bashkë me Thomas Mithan, mbërritën në Rinas në të njëjtin avion, më datë 3 Prill dhe hipën në një makinë tip ‘Golf’, që i çoi drejt Shëngjinit.
Mithan qëndroi vetëm 36 orë në Shqipëri, e u largua më pas duke hequr dorë nga bashkëpunimi me pjesën tjetër të grupit. Gjykatës së ekstradimeve iu tha po ashtu se në ditën kur Mithan u largua nga Shqipëria, Harriet Bridgeman dhe Steven Hunt shfaqen për herë të parë të dy bashkë, në hotelin ‘Coral’, duke bërë filmime teksa Ardian Nikulaj qëndronte atje.
Seanca e radhës e këtij procesi ekstradimi në Londër do të mbahet në fillim të qershorit.
