Policia e Korçës ka arrestuar dy persona dhe ka nisur procedimin penal për 23 të tjerë, pas protestës studentore të zhvilluar një ditë më parë në qytet. Sipas njoftimit zyrtar, disa pjesëmarrës të maskuar dyshohet se kanë ushtruar akte dhune, duke hedhur gurë, pllaka guri dhe sende të forta metalike në drejtim të institucioneve shtetërore dhe pronave publike.
Si pasojë, janë dëmtuar godinat e Bashkisë së Korçës, Drejtorisë Arsimore, Universitetit “Fan S. Noli” dhe gjimnazit “Raqi Qirinxhi”. Dëmtime janë shkaktuar edhe në kangjellat e trotuareve, tabelat e reklamave dhe sinjalistikën rrugore. Policia bën me dije se masat janë marrë në përfundim të veprimeve hetimore lidhur me incidentet e regjistruara gjatë tubimit.
Njoftimi i Policisë:
Korçë/Kundërshtuan punonjësit e Policisë, shkatërruan me sende të forta dhe me zjarr, godinat e institucioneve shtetërore dhe prona publike, gjatë tubimit të djeshëm, arrestohen në flagrancë 2 shtetas, procedohen penalisht 23 të tjerë. Gjatë tubimit të zhvilluar dje, në qytetin e Korçës, dhjetëra pjesëmarrës, disa prej tyre të maskuar, kanë ushtruar akte dhune, duke hedhur gurë, pllaka guri dhe sende të forta metalike drejt institucioneve shtetërore dhe pronave publike.
Si pasojë e këtyre veprimeve të kundërligjshme, janë dëmtuar godinat e bashkisë Korçë, Drejtorisë Arsimore, universitetit “Fan. S. Noli” dhe gjimnazit “Raqi Qirinxhi”, si dhe kangjellat e trotuareve, tabelat e reklamave dhe sinjalistika rrugore. Gjatë gjithë tubimit, punonjësit e Policisë të planëzuar me shërbim janë përballur me akte dhune dhe kundërshtimi, përmes hedhjes së gurëve dhe sendeve të forta nga grupe pjesëmarrësish të maskuar.
Në vijim të veprimeve hetimore dhe procedurale të kryera në drejtimin e Prokurorisë së Korçës, u arrestuan në flagrancë shtetasit F. L., 21 vjeç, banues në Voskop dhe O. K., 19 vjeç, banues në Bilisht, si dhe u proceduan penalisht 23 shtetas (15 prej tyre të mitur). Grupi hetimor, në bashkëpunim me Prokurorinë, vijon punën për dokumentimin e plotë ligjor të veprimeve të kundërligjshme të kryera gjatë tubimit të datës 15.10.2026 dhe për identifikimin e shtetasve të tjerë të përfshirë në akte dhune ndaj punonjësve të Policisë, institucioneve shtetërore dhe subjekteve private, gjatë kësaj date. Materialet procedurale iu referuan Prokurorisë së Korçës, për veprime të mëtejshme.
Nxënësit e gjimnazeve në Shkodër kanë bojkotuar mësimin këtë të premte, duke iu bashkuar protestave të të rinjve që janë shtrirë edhe në qytete të tjera të vendit. Me thirrjet “Bojkotoni mësimin” dhe “Rama, jep dorëheqjen”, gjimnazistët kanë dalë në rrugët e qytetit të Shkodrës.
Protesta e zhvilluar nga gjimnazistët në Lezhë, të cilët bojkotuan mësimin këtë të premte, është shoqëruar me tensione dhe përplasje me policinë. Pas tentativës së dështuar për të hyrë në ambientet e Bashkisë, protestuesit kanë thyer xhamat e një gjimnazi, si dhe kanë shkulur disa kangjella dhe tabela të sinjalistikës rrugore.
Ndërkohë, situata është tensionuar më tej nga përplasjet mes protestuesve dhe efektivëve të policisë. Sipas raportimeve, zëvendësdrejtori i Rendit u ka dhënë urdhër efektivëve të tërhiqen.
Protestave u janë bashkuar edhe nxënës në Elbasan e Gramsh, të cilët kanë braktisur mësimin për të protestuar. Ndërkohë, gjimnazistët e Kamzës janë grumbulluar që në orët e para të mëngjesit pranë shkollave dhe më pas kanë nisur marshimin drejt Tiranës.
j.l./ dita
