Protestat, Rama për median gjermane: Shqipëria nuk shitet

Protestat e përditshme në Tiranë, të njohura si “Revolucioni i Flamingove”, dhe përballja me Kryeministrin Edi Rama janë në fokus të një artikulli të publikuar nga gazeta gjermane “Frankfurter Allgemeine Zeitung”.

Sipas artikullit, pavarësisht vijimësisë së tyre prej më shumë se 100 ditësh, protestat nuk kanë arritur të shndërrohen në një revoltë masive. Kryeministri Rama i konsideron ato një provë besimi për qeverinë e tij dhe një mundësi për reflektim.

“Për mua është një sfidë. Por kjo është diçka e mirë. Gjatë gjithë jetës sime politike, gjërat nuk kanë shkuar kurrë vërtet mirë kur nuk jam sfiduar. Zakonisht jam më i mirë kur sfidohem. A do të jem më i mirë edhe këtë herë? Shpresoj. Nuk e di. Koha do ta tregojë. E ardhmja do ta dëshmojë”, citohet Kryeministri Rama.

Sipas kryeministrit, tashmë nevojitet një “shtet përkujdesës”, i cili dëgjon dhe merr seriozisht nevojat e qytetarëve.

Sa i përket investimeve të mundshme në Zvërnec dhe në ishullin e Sazanit, Kryeministri Rama thotë se nuk mund të flitet për një “shitje” të Shqipërisë. Ai sqaron se ishulli i Sazanit vijon të jetë pronë e shtetit shqiptar.

“Rama këmbëngul se promovimi i investimeve të huaja direkte, veçanërisht në sektorin e turizmit, nuk e bën atë një vegël të Trumpit. Sipas tij, perspektiva e investimeve me vlerë mbi katër miliardë euro në projektet e planifikuara nga Jared Kushner dhe partnerët e tij nuk është diçka që një kryeministër mund ta refuzojë thjesht, nëse mendon për interesin e vendit”, shkruhet në artikull.

Lidhur me ndikimin e protestave në turizëm, artikulli vëren se ato sollën një ngadalësim të lehtë të rritjes së sektorit, por situata duket se është kapërcyer. Shqipëria pritet të regjistrojë këtë vit 14 deri në 15 milionë vizitorë, krahasuar me rreth 12.5 milionë një vit më parë.