Provat e reja të 21 janarit, “një vrimë në ujë?” Familja e Aleks Nikës reagon për shkrimin e Viktor Malajt: “Shumë respekt, por je nxituar”

Mark Nika, xhaxhai i Aleks Nikës, një nga 4 dëshmorët e 21 janarit, ka reaguar sot lidhur me opinionin e analistit të Ditës, Viktor Malaj.

Malaj shkruan në analizën e sotme se audiot e 21 janarit që janë publikuar së fundmi nuk janë prova bindëse dhe se dhënia e tyre familjarëve të Aleksit është papërgjegjshmëri e gazetarit Artan Hoxha.

Por zoti Nika, i cili është angazhuar prej vitesh si përfaqësues i familjes Nika, nuk është aspak dakord me përfundimet në të cilat ka arritur publicisti i njohur, Malaj.

Në një telefonatë kryeredaktorit, zoti Nika tha se Malaj nuk ka informacion mbi përmbajtjen e plotë të audio-përgjimit, dhe për këtë shkak ka arritur në përfundime të nxitura.

“Jam lexues prej vitesh i gazetës DITA dhe veçanërisht i Viktorit, me të cilin edhe kam komunikuar në të shkuarën e afërt, pasi ai ka shkruar edhe herë të tjera për 21 janarin.

Kemi shumë respekt, por ajo që thotë sot se provat e reja janë një vrimë në ujë, është e nxituar. Ai ndoshta nuk e ka informacionin e plotë, por audio nuk ndalet aty ku e ndal Viktori.

Në audio dëgjohet urdhëri për të qëlluar në mish.

Me atë që ka shkruar sot, Viktori pa dashur zhvlerëson një fazë shumë të rëndësishne të hetimeve të 21 janarit, drejt asaj që kemi vite që e presim zemërcopëtuar, drejtësi të vërtetë për të rënët, jo të manipuluar, për Aleksin tonë dhe për të tjerët”.

Nika thotë gjithashtu se nuk qëndron as përfundimi tjetër, në shkrimin e zotit Malaj, se dorëzimi i audios tek familjarët është papërgjegjshmëri e gazetarit Hoxha.

“Nuk është e tillë, ndoshta Artani do donte të fliste vetë për këtë pjesë, por për ne si familje ka qenë ndihmë e madhe. Ka qenë e tillë sepse pak kohë më parë ka ndodhur që na ka ardhur dikush në familje me një fotografi në duar, na tha “ky është vrasësi”, ka qenë gardist dhe ai dhe ne mund të ishim futur në histori të tjera, por audiot e dhëna familjes nga gazetari na kanë ndihmuar për këtë” – tha z.Nika gjatë telefonatës.

Familja Nika, më herët ka deklaruar se materialin audio do ta dorëzojë vetëm në SPAK dhe se hetimi për vrasjen e Aleksit (i vetmi hetim-gjykim që nuk është kryer ende për 21 janarin) duhet të kryhet nga Prokuroria e Posaçme.

Më poshtë, pjesa e shkrimit të Viktor Malajt, që solli reagimin e Nikës:

“… Para pak kohësh media njoftoi se një gazetar investigativ paska bërë publike një audiokasetë të ngjarjeve të 21 janarit 2011, ku dëgjohet që ish-komandanti i Gardës së Republikës iu paska thënë vartësve të vet “Kur turma të futet brenda rrethimit, bëhuni gati për zjarr …”.

Partia në pushtet njoftoi se paska bërë kallëzim penal për vrasje në SPAK në ngarkim të S. Berishës, L. Bashës dhe ish-komandantit të Gardës, z. N. Prendi.

Ky lajm “i bujshëm” entuziazmoi tifozët e pushtetit aktual dhe krijoi një paqartësi tek shumëkush që nuk do t’ia dijë shumë për partitë politike pasi ka humbur respektin dhe besimin tek të gjitha ato që janë në skenë prej mbi tre dhjetëvjeçarë. Për mua e gjithë kjo zhurmë është një vrimë në ujë. Nuk ka asnjë dyshim se vrasjet e 21 janarit 2011 kanë qenë të paligjshme dhe kriminale, ashtu si, tashmë, dihet se janë kryer nga funksionarë të lartë të Gardës dhe, të paktën, në praninë fizike të ish-Kryeministrit dhe ish-Ministrit të Brendshëm.

Shprehja “Kur turma të futet brenda rrethimit, bëhuni gati për zjarr…”, as nuk është e paligjshme dhe as do të thotë “vrisni njerëz”. Çdo shqiptar, me apo pa arsim, me apo pa kulturë, duhet ta mësojë një herë e mirë se atje ku objekte të ndryshme ruhen me roje të armatosur ekziston e drejta dhe mundësia e përdorimit të armëve me të cilat forcat e sigurisë janë pajisur ligjërisht. Gjithë çështja qëndron në përdorimin e këtyre armëve sipas kushteve dhe kërkesave ligjore e nënligjore apo në kundërshtim me to.

Në ngjarjen e 21 janarit 2011 armët e zjarrit janë përdorur në kundërshtim me kërkesat e legjislacionit dhe ky fakt i bën pasojat automatikisht të paligjshme.

Dhënia e kasetës babait të njërit prej viktimave është një veprim mendjelehtë dhe i papërgjegjshëm i gazetarit. Është fare i lehtë manipulimi i njerëzve që janë në hall, dhe nuk ka hall më të madh se vrasja e fëmijës. Kallëzimi penal i bërë nga PS-ja është thjesht një shfaqje (show).

Të vërtetën e plotë të vrasjeve dhe plagosjeve të 21 janarit e dinë S. Berisha, L. Basha dhe N. Prendi. Syri i nxirë i komandantit të Gardës, autorësia e provuar në vrasje e drejtuesve të Gardës, fshirja e kasetave të regjistruara nga 13 kamerat e sigurimit të godinës qeveritare, përpjekjet e S. Berishës për të fajësuar protestuesit si autorë të vrasjeve, pengimi prej tij i organeve të drejtësisë në zbatimin e procedurave penale, punësimi në Presidencë i personit përgjegjës për kamerat e sigurisë, pohimet e mëvonshme të Berishës dhe L. Bashës se “në 21 janar kemi zbatuar ligjin” (kjo do të thotë se vrasjet kanë qenë të ligjshme) dhe pohimet prej “trimi të çartur” të Berishës se mund të vriteshin edhe 300 protestues dhe se, po u përsërit “ardhja pranë zyrës time” e liderit të opozitës dhe protestuesve, ai (Sali Berisha) do të ishte snajperisti i pestë (pra, një vrasës i mundshëm), nuk lënë kurrfarë dyshimi se vrasjet dhe plagosjet janë bërë nën hyqmin e ish-Kryeministrit.

Mirëpo, tjetër gjë janë deduksionet dhe tjetër gjë janë analizat juridike mbi bazën e provave në një procedim penal. Që t’iu provohet fajësia për vrasje tre personave të kallëzuar penalisht nevojitet që ish-Komandanti i Gardës dhe L. Basha të tregojnë gjithçka dinë për atë ngjarje. Basha tha vjet, pasi Berisha me lukuninë e tij sulmuan selinë e PD-së, se ai nuk iu përgjigj sulmuesve “siç iu përgjigj Sali Berisha në 21 janar 2011”.

Kjo do të thotë se drejtuesi dhe urdhëruesi i zjarrit kundrejt protestuesve paqësorë ka qenë ish-Kryeministri, mirëpo Basha nuk ka personalitetin e duhur dhe, për pasojë, as dinjitet burri të paraqitet në SPAK dhe të tregojë të vërtetën, aq më tepër që ishte i pranishëm fizikisht në vendngjarje. Pra, ekziston mundësia të ketë pasur një rol në ardhjen e pasojave.

Nëse PS-ja e kishte sinqerisht dhe seriozisht ndëshkimin e fajtorëve të 21 janarit, nuk kishte arsye të priste dhjetë vjet nga ardhja në pushtet. Qysh në opozitë duhej të hulumtonte për gjetjen e provave fajësuese dhe, në vitin 2013 duhej ta padiste Sali Berishën penalisht.

Nëse nuk kishte prova për vrasje, kishte provat e mjaftueshme për pengim të drejtësisë nga Sali Berisha, fshehje të gjurmëve të krimit, përkrahje pas kryerjes së krimit, refuzim për të dëshmuar etj.etj. Dhe këto prova i jepte me krenari prej banditi vetë Berisha në intervista televizive dhe shtyp. Në vitin 2013 asnjëra nga këto vepra penale nuk ishin parashkruar dhe as amnistuar. Edhe nëse drejtësia ishte nën kthetrat e autorit të krimeve, të paktën dosjet dhe proceset do të mbeteshin aty.

Tani është tepër vonë dhe kallëzimet penale të tipit “më ka çuar nëna të laj gojën” nuk kanë as vlerë dhe as i iu bëjnë nder kallëzuesve…”

Shkrimi i plotë i Malaj: KËTU

o.p. / dita