Provimet për lejet e reja të ushtrimit të profesionit në mësuesi do të vijojnë edhe gjatë javës së ardhshme. Do të jenë mësuesit e rinj të matematikës që do t’i nënshtrohen të martën provimit të shtetit për të fituar licencën profesionale.
Vetëm mësuesit që do të kalojnë në provimin e licencës në këtë sezon, do të mund të konkurrojnë me tej nëpërmjet portalit online të punësimit, për vendet e lira të punës që raportohen nga shkollat publike të arsimit parauniversitar (shkollat 9-vjeçare dhe gjimnaze). Marrja e provimit është i domosdoshëm edhe për rastet e konkurrimit për vendet e lira të punës në shkollat jopublike.
Sikundër ka ndodhur edhe me profilet e tjera, edhe për këtë lëndë, provimi do të zhvillohen sipas orarit të përcaktuar nga Qendra e Shërbimeve të Arsimit (QSHA), çka do të thotë se secili mësues duhet të paraqitet për të plotësuar testin e informatizuar vetëm në orën e përcaktuar specifikisht për të.
Qendra e Shërbimeve të Arsimit ka zbardhur tashmë listën e 161 mësuesve të rinj që do të konkurrojnë për licencën profesionale në datën 2 maj. Për të mos rrezikuar hyrjen në testim, kandidati duhet të paraqitet në ambientet e QSHA-së 30 minuta para fillimit të orarit zyrtar të provimit. Ndërkohë që duhet të ketë me vete detyrimisht këto dokumente: “Mjet identifikimi, si dhe kopje të tyre, faturën origjinale me vulën përkatës të pagesës së tarifës së provimit sipas herës së pjesëmarrjes, kopje (jo të noterizuara) të diplomave të ciklit të parë dhe të dytë të studimeve të përfunduara, si dhe kopje të dëshmisë së njohjes së gjuhës së huaj”. Kandidatët, të cilëve u mungojnë këto dokumente, nuk mund të marrin pjesë në provimin e shtetit. Për paraqitjen në qendrat e provimit, kandidati duhet të ketë parasysh rregullat në vijim, ku: “Ndalohet marrja me vete dhe përdorimi i celularëve dhe mjeteve të tjera të komunikimit gjatë zhvillimit të provimit, pasi ky vlerësohet si kriter përjashtimi, ndalohet komunikimi gjatë zhvillimit të provimit, ndalohet duhani dhe konsumimi i ushqimit në mjediset e provimit”
Provimi do të jetë i strukturuar në tre pjesë, të cilat përfshijnë pyetjet rreth njohjes së rregullave të drejtshkrimit të gjuhës shqipe, pyetjet rreth pedagogjisë, metodave të mësimdhënies dhe menaxhimit të klasës, si dhe pyetjet specifike për profilin lëndor të matematikës, në të cilin mësuesi kërkon të fitojë lejen e ushtrimit të profesionit. Për t’u ardhur në ndihmë kandidatëve, QSHA ka detajuar edhe fondin e mijëra pyetjeve nga të cilat do të përzgjidhen edhe pyetjet që do të jenë pjesë e tezës së provimit të licencës. Në këto kushte, çdo kandidat mund të orientohet rreth përmbajtjes që do të ketë testi i licencës, duke u njohur me fondin e detajuar të pyetjeve që gjendet në faqen online të QSHA-së.
p.k\dita
