Partia Socialiste pritet të marrë një fitore të thellë në zgjedhjet vendore të 14 majit. Ajo udhëheq numërimet jozyrtare në shumicën dërrmuese të 61 bashkive të vendit ndërkohë që zyrtarisht është shpallur fituese në tre bashki, atë të Elbasanit, Kamzës dhe Vorës.
Në këto bashki, falë numërimit dhe votimit elektronik, u shpall me shpejtësi.
Në Elbasan, kandidati socialist Gentian Llatja, drejtuesi aktual i bashkisë, u rikonfirmua me 55 përqind, ose me një diferencë me mbi 4500 vota ndaj kandidatit të koalicionit opozitar “Bashkë Fitojmë”, Luçiano Boçi, ish deputet i kësaj zone. Socialistët kanë marrë 48 përqind të votave dhe për Këshillin bashkiak, ku falë aleatëve të saj e kalon me lehtësi 50 përqindëshin e nevojshëm për të marrë kontrollin e shumicës.
Koalicioni “Bashkë Fitojmë”, në të cilin është përfshirë pjesa e demokratëve që udhëhiqet nga ish kryeministri Sali Berisha, së bashku me Partinë e Lirisë, ka marrë 23.89 përqind të votave, ndërkohë që Partia Demokratike e drejtuar nga Enkelejd Alibeaj, 12.93 përqind.
Fitore të thellë socialistët kanë rregjistruar në dy bashkitë e tjera të Vorës dhe Kamzës, ku veçanërisht kjo e fundit ka qenë tradicionalisht një bastion i së djathtës. Në Kamëz, kandidati socialist Rakip Suli ka grumbulluar 60.65 përqind të votive, ose 10 mijë më shumë se kandidati i koalicionit “Bashkë Fitojmë”, Bilbil Bajraktari, i cili nuk ka shkuar më shumë se 35 përqind.
Në këtë Bashki, e djathta përfaqësohej dhe nga një kandidat i Partisë Demokratike, Arjan Hoxha, i cili ka marrë vetëm 4.24 përqind.
Akoma më e thellë, është fitorja e kandidatit socialist Blerim Shera në Vorë, një bashki e vogël që ndër vite ka kaluar sa nga e djthata dhe nga e majta. Zoti Shera ka marrë 74.28 përqind, ose 8125 vota kundrejt 2813 mijë votash të grumbulluara nga kandidati i koalicionit “Bashkë Fitojmë”.
Ndërsa në pjesën tjetër të vendit ka nisur procesi i numërimit të votave, kryeministri Edi Rama, njëkohësisht dhe kryetar i Partisë Socialiste, ka paralajmëruar, përmes një postimi në Facebook, një fitore të thellë, me të paktën 50 nga 61 Bashki të vendit.
Pjesëmarrje e ulët
Në zgjedhjet e djeshme, u vu re një pjesmarrje e ulët në votime. Komisioneri shtetëror i zgjedhjeve, Ilirjan Celibashi deklaroi se shifrat nga qendrat e votimit flasin për një pjesmarrje në kuotat e 34 deri 35 përqind, 12 pikë përqindje më poshtë se sa zgjedhjet e fundit politike të vitit 2021.
Procesi i djeshëm, rregjistroi probleme të shumta me funksionimin e pajisjeve të instaluara për identifikimin elektronik të votuesve, në pjesë të ndryshme të vendit, përfshirë dhe Tiranën, ku pajisja nuk funksionoi as në qendrën ku votoi ish kryeministri non grata për korrupsion Sali Berisha.
Komisioneri Celibashi dhe nënkomisionerja Lealba Pelinku, pasi kishin kaluar më shumë se 2 orë e gjysëm, nga nisja e procesit, u detyruan të urdhëronin që aty ku pajisja nuk funksionon “identifikimi të vijojë me mënyrën tradicionale”.
Bëhet fjalë për mbi 500 nga 5.213 qendra votimi në të cilat identifikimi elektronik dështoi.
Megjithatë, sipas deklarimeve të zotit Celibashi pasdite, në “tërësi procesi i votimi ka shkuar normalisht. Mendoj se është tejkaluar problematika e identifikimit elektronik, sepse procesi vijon me mënyrën tradicionale. Mbetet për t’u verifikuar në 502 qendra votimi pse ka ndodhur kjo situatë, dhe jemi duke punuar për këtë. E rëndësishme është që në pjesën tjetër, procesi i identifikimit elektronik, shkoi shumë mirë”.
Denoncime të ndryshme
Nuk kanë munguar gjatë ditës denoncime për aspekte të ndryshme të procesit, që nga votimet familjare të prania e personave të paautorizuar pranë qendrave të votimit, por deri më tani, ato nuk duket të kenë qenë të përmasave që mund të vënë në pikëpyetje integritetin e votimit.
Zgjedhjet për pushtetin vendor u monitoruan nga misioni i vëzhguesve ndërkombëtarë të ODIHR-it, i kryesuar nga ambasadorja Audry Glover e cila sot ndoqi personalisht ecurinë e procesit në disa qendra votimi. Të shpërndarë në të gjithë vendin kanë 165 vëzhguesë afatshkurtër, krahas disa dhjetrave të tjerë nga organizata ndërkombëtare dhe ambasadat e huaja të akredituara në Shqipëri.
Veç bashkive, Elbasan, Kamëz dhe Vorë, ku rezultatet u publikuan menjëherë pas mbylljes së procesit, numërimi në pjesën tjetër të vendit do realizohet manualisht, në 92 qendra të numërimit.
Në garë ishin 144 kandidatë nga 40 parti dhe koalicione, përfshirë dy kandidatë të pavarur. Ndërsa për 1603 pozicionet e anëtarit të Këshillave bashkiakë, konkuruan rreth 23 mijë e 700 kandidatë, përfshirë 10 të pavarur.
Humbës, por krenarë. Fillon avazi...
Koalicioni Bashkë Fitojmë i drejtuar nga Sali Berisha, non grata për korrupsion nga SHBA dhe Britania e Madhe, ka dhënë shenja se do veprojë si në vite të shkuara. Humbës, por krenarë, ata nuk do ta pranojnë rezultatin, duke fajësuar “regjimin” dhe “krimin”, por jo veten për rezultatin.
Berisha tha se do të kërkojë auditim të aparaturave me të cilat u votua elektronikisht, duke thënë se nuk e pranon rezultatin në Elbasan, Kamëz dhe Vorë.
Edhe kandidati Bardh Spahia ka kndërshtuar rezultatet e para që nxjerrin fitues në Shkodër, Benet Becin.
n.s. / dita
Ku është fitorja ?!….në zgjedhjen e antishqiptarit më të tërbuar të Himarës terroristin e trojeve shqiptare ,dhe bashkë me këtë Dulen që bëjnë thirrje hapur kundër shqiprisë.dhe më e keqja asnjë gazetar nuk raegon për këtë kriminel antishqiptar ,ta përzënë me dru nga studjot e TV-ve ,por heshtin duan të mbajnë lidhjet me monarko-fashistë që fusin hundët në punët tona,tani opozita është shkërmoqur ,kurr me mashtrime e gënjeshtra nuk do fitoi ,me prralla ,autobuza falas etj si me çekun e bardhë .Këta nuk duan të punojnë .