Pse humbi Trump, sipas vetë Trump: Pjesë nga intervista që po konsiderohet si “më e sinqerta” dhënë ndonjëherë prej tij

Nga Migena Aleksi

Në një intervistë të gjatë dhënë për emisionin ikonik “60 Minutes”, Presidenti amerikan Donald Trump ka ofruar analizën e tij më të thellë deri më tani mbi disfatën e rëndë historike të Partisë Republikane në zgjedhjet e mesmandatit.

Për herë të parë, kreu i Shtëpisë së Bardhë ka pranuar hapur se politika e tij e fortë e dëbimeve masive të emigrantëve mund të ketë qenë “shumë e ashpër” dhe se ajo ka shërbyer si një nga faktorët që i kushtoi shtrenjtë partisë në zgjedhje.

Politika e imigrimit dhe e kufijve

I pyetur nga korrespondenti nëse qasja e ashpër ndaj imigrimit kishte shkuar shumë larg, Trump u tregua reflektues mbi pasojat elektorale të kësaj linje, e cila kishte qenë në qendër të platformës së administratës së tij.

​“Mendoj se ishte shumë e ashpër,” u shpreh Trump. “Mendoj se mund të jetë shumë e ashpër, po. Dhe shumë njerëz do të thonë se kjo është e mrekullueshme. Por shumë njerëz mendojnë se është tepër e ashpër”.

Presidenti shtoi se strategjia e kufijve kishte një natyrë të dyfishtë për elektoratin: “Ajo si e ndihmoi, ashtu edhe e dëmtoi”. Ai mbrojti mbylljen e kufijve dhe largimin e personave me rrezikshmëri të lartë, por pranoi se vala e gjerë e dëbimeve krijoi pakënaqësi dhe u kthye në një bumerang politik.

Faktorët e tjerë të disfatës: Lufta, ekonomia dhe mesazhet

Përveç imigrimit, Trump diskutoi edhe arsyet e tjera që sollën rënien e republikanëve në zgjedhje, duke përfshirë pakënaqësinë e votuesve ndaj çmimeve të karburanteve dhe angazhimet ushtarake, si konflikti në Iran.

Ndërsa pranoi se vendimet strategjike ushtarake mund të kenë kosto në afatin e shkurtër për shkak të perceptimit publik, ai u shpreh i bindur se historia do t’i gjykojë si vendime të drejta për sigurinë kombëtare.

Paralajmërimi për ndryshime në kabinet dhe mesazhi ndaj kundërshtarëve

Intervista e bujshme shërbeu gjithashtu si prelud për ndryshimet e para brenda strukturave drejtuese në Uashington. Pak pas regjistrimit të saj, u konfirmuan lëvizjet e para në nivelet më të larta të administratës, përfshirë largimin e shefes së kabinetit Susie Wiles.

Në përmbyllje të bisedës, kur u pyet nëse mund të gjente falje në zemrën e tij për kundërshtarët dhe armiqtë e tij politikë, Trump refuzoi të lëshonte pe, duke deklaruar drejtpërdrejt:

“Mund të jem i sinqertë? Unë ndoshta nuk e bëj dot këtë, jo, sepse unë i urrej disa nga armiqtë e mi dhe do t’i urrej përgjithmonë”.

DITA