Nga Alyssa Rosenberg
Të enjtën pasdite, një burrë të cilin autoritetet e kanë identifikuar si Ricky Shiffer u qëllua dhe u vra në një përplasje me oficerët e policisë pasi u përpoq të hynte në një zyrë të FBI-së në Cincinnati.
Raportet sugjerojnë se ai ishte motivuar nga mbështetja e madhe ndaj ish-presidentit Donald Trump dhe nga zemërimi që kishte me FBI-në pas kërkimit në resortin Mar-a-Lago të Trump.
Të enjten në mbrëmje, The Post raportoi se sipas burimeve, kërkimi i FBI-së në Mar-a-Lago kishte për qëllim pjesërisht gjetjen e “dokumenteve të klasifikuara në lidhje me armët bërthamore”.
Përgjigja e Trump, ishte një postim në Truth Social, platforma që ai themeloi, duke deklaruar, “Çështja e armëve bërthamore është një mashtrim” dhe një sugjerim i rremë se “Barack Hussein Obama” kishte bërë diçka të ngjashme.
Por çfarëdo që mund të mësojmë për motivimet e Shiffer dhe rezultatet e kërkimit të FBI-së, një gjë është e qartë: numri i njerëzve që kanë vdekur në shërbim të një idhulli aq të padenjë sa Donald Trump është tragjik.
Zoti e di, që Trump nuk është i vetmi person, ndjekësit e të cilit sillen në mënyrë të tillë. Fansat e guximshëm të Johnny Depp dhe ata që morën pjesë në luftën online të reperit Kanye West kundër aktorit Pete Davidson janë prova se kryqëzatat e tmerrshme të të gjitha llojeve nuk do të mungojnë kurrë për rekrutët.
Por kjo ndryshon kur njerëzit fillojnë të vdesin. Katër nga mbështetësit e Trump vdiqën në trazirat e 6 janarit 2021 në Kapitol: Ashli Babbit, e cila u qëllua teksa po përpiqej të ngjitej nga një dritare e thyer; Kevin Greeson, i cili pësoi një atak kardiak; Benjamin Philips, i cili u qëllua dhe Rosanne Boyland, shkaku zyrtar i vdekjes së së cilës ishte nga amfetamina.
Christopher Stanton Georgia vdiq nga vetëvrasja më vonë atë muaj pasi u arrestua nën akuzën për hyrje të paligjshme në ndërtesë. Ai u deklarua i pafajshëm para vdekjes së tij.
Tani vjen vdekja e Shiffer, i cili gjithashtu ishte me sa duket në Kapitol më 6 janar. Disa mund të tundohen të krijojnë distancë nga këto tragjedi përmes ironisë, ose duke i trajtuar besimtarët e Trump si të çuditshëm. Një artikull i vitit 2020 në New York Times fliste për një fermer të ve në Indi, i cili e cilësoi Trumpin si një hyjni personale, më pas vdiq pasi refuzoi të hante kur Trump doli pozitiv mr Covid-19.
Një trishtim i vërtetë qëndron pas këtyre historive. Ashli Babbitt po kërkonte një motiv për të vazhduar përpara sepse karriera e saj ushtarake nuk po ecte dhe kompania e saj e pishinave ishte në prag të falimentimit.
Teoria e konspiracionit QAnon – e cila e ka cilësuar Trumpin si një mburojë kundër një “grupi të fshehtë pedofilësh të fuqishëm”- i dha Rosanne Boyland-it një dritare për të parë botën ndërsa luftonte me varësinë nga droga.
Absurditeti dhe shkaku për të cilin këta njerëz kanë vdekur vetëm sa e shton tmerrin e vdekjes së tyre.
Por si ka mundësi që askush, asnjë institucion, nuk mund të ofrojë diçka më thelbësore sesa zbrazëtia e dukshme e Trump dhe Trumpizmit?
Një pjesë thelbësore e magjisë malinje të Trump është papërshkueshmëria e tij. Provoni të nxirrni në pah arrogancën e tij dhe ndjekësit ju vënë në shënjestër. Sugjeroni që Trump po i mashtron ndjekësit e tij dhe ju do akuzoheni si “lodër e shtetit”. Sipas mbështetësve të tij, nuk ka asnjë akt, për të cilin vetë Trump mund të jetë përgjegjës.
Megjithatë, duhet të shqetësohemi për sigurinë e banorëve të Trumpland. Pavarësisht çfarë ata mendojnë, ne duhet të kujdesemi për ta, sepse njerëzit që vdesin për Donald Trump çdo ditë mund të marrin të tjerë me vete.
