Ekspertiza teknike e kërkuar nga Prokuroria italiane mbi mbytjen e mega-jahtit Bayesian ka arritur në një përfundim kyç: anija luksoze nuk kishte asnjë defekt fabrikimi apo strukturor dhe ndodhej në kushte të shkëlqyera teknike në momentin e katastrofës.
Tragjedia e ndodhur gjatë një stuhie të fuqishme detare në 19 gushtin e kaluar i mori jetën 7 personave nga 22 që ndodheshin në bord (12 pasagjerë dhe 10 anëtarë ekuipazhi).
Mes viktimave ishin sipërmarrësi dhe miliarderi britanik i teknologjisë Mike Lynch dhe vajza e tij 18-vjeçare Hannah, kryetari i bankës Morgan Stanley International Jonathan Bloomer me bashkëshorten e tij Judy, avokati amerikan Chris Morvillo me të shoqen Neda, si dhe kuzhinieri i anijes Recaldo Thomas.
Ndërkohë, 15 persona të tjerë arritën të shpëtonin të gjallë.
Përfundimet e plota të konsulencës inxhinierike të prokurorisë pritet të dorëzohen zyrtarisht në mes të muajit shtator. Mirëpo, të dhënat e para teknike përjashtojnë çdo lloj dështimi ose të mete në strukturën e anijes së ndërtuar nga kantieri i njohur Perini Navi, duke e zhvendosur të gjithë peshën e hetimit te faktori njerëzor dhe vargu i gabimeve nga ana e ekuipazhit gjatë stuhisë natën e ngjarjes.
Hetuesit po fokusohen në vlerësimin e menaxhimit të situatës emergjente nga kapiteni dhe anëtarët e tjerë të ekuipazhit — përfshirë lënien hapur të hyrjeve apo shkallëve që lejuan depërtimin e shpejtë të ujit, pozicionin e kuvertës uilëse (keel), si dhe vonesën në dhënien e alarmit për pasagjerët.
Nga ana tjetër, tragjedia ka lënë pasoja të rënda financiare dhe reputacionale për ndërtuesin e jahtit.
Marka historike Perini Navi (pjesë e grupit The Italian Sea Group), po përballet me tronditje në treg, ku krahas proceseve gjyqësore po shqyrtohen mundësitë e ristrukturimit apo shitjes së aktiveve për të shmangur rreziqet e falimentimit dhe për të mbrojtur stafin e kompanisë.
d.xhima / dita
