Pse zhgënjimi është kaq i thellë

Nga Edona Llukaçaj

Botuar në DITA

Retorika e lidershipit politik gjatë para-fushatës zgjedhore po karakterizohet sërish e velshëm nga kërcënimet dhe premtimet për të përplasur “drejtësisht” rivalët pas hekurave, ku, sipas tyre, edhe e kanë vendin. Por e gjitha kjo nuk po ngjit në publikun e gjerë. Jo më, të paktën.

Arsyeja nuk është thjesht fakti se kanosja me pranga ndaj kundërshtarit nuk përbën aspak risi në diskursin politik të këtyre dekadave, edhe kur qëllon e nuk është e manget në argumenta bindës.

Apatia publike ndaj arrestimit hipotetik të ndonjërit prej tyre është e rrënjosur në të vërtetën e hidhur se, historikisht, arrestimet dhe dënimet e ish-pushtetarëve tanë janë ndërmarrë për krime të papërfillshme a inekzistente. Për më tepër, nuk kanë shënjuar kurrë ndryshime të prekshme pozitive.

Rasti i bashkëshortes së ndjerë të diktatorit Hoxha, dënuar për konsumin e tepërt të kafes dhe sheqerit, duhet te jetë më tipiku. Pa llogaritur se mendësia dhe metodologjia politike mbeti po ajo. Prandaj, veç personit të tyre, besoj familjarëve e ndonjë ithtari prej interesit, nuk kanë pse të miklohen shqiptarët.

Nuk i intereson njeriu se kryeministrin Edi Rama e paskan sharë nga vëllai, djali që është bërë burrë apo ish-bashkëshortja e para 30 viteve. Se tash nuk duron më dhe do bëjë “Babalen” precedent për edukimin me të vërtetën e brezave të politikanëve të ardhshëm. Apo edhe se cilat janë preferencat e tija vetjake në një mori sferash, përfshi ato më personalet dhe intimet.

Haptazi, pakkujt i bëhet vonë nëse doktor Berisha i bën akuzat dhe thirrjet për mosbindje nga 5-6 herë në ditë, si vakte dietologësh, prej ballkonit te “M. Matohiti” apo prej zyrave te ish-ShQUPI. Edhe shërbimin e imagjinuar ndaj demokracisë mbarëbotërore me pusulla shkarravitur në dokumenta zyrtare paraqitjeje nuk preket kush nëse e bën një a dy herë në muaj.

Po aq përshtypje po na bën edhe nëse kryebashkiakun Veliaj e ftojnë në SPAK për një dorë muhabet konstruktiv apo thirret në tjetër cilësi. Nëse ish-presidenti Meta ka ku të stërvitet në qeli apo se ku do e vendosë çadrën Kryemadhi. Nëse të tjerë të zgjedhur dhe të emëruar bien në labirinthe ligjore prej çfarë kanë bërë apo kanë neglizhuar të bëjnë.

Shqiptarëve nuk u bën më përshtypje asgjë, aq më pak sjellja fort e përshtatshme për formatin Big Brother e një lukunie primitive që pretendon se na udhëheq. Janë tepër të lodhur nga hallet e veta për t’i vënë veshin maskaralliqeve të një grusht njerëzish, të shpërlarë nga çdo vlerë dhe që kontribuojnë në harmoni të plotë për të shtypur çdo mundësi të qenësishme progresi.

Shqiptarët e kanë mësuar nga përvoja ndër dekada se as alternativat joshëse, që gjithnjë shpresohet të sjellin një frymë të re, në këtë qerthull mbytës, nuk mbijetojnë dot. Bëhen neveritshëm palë e pjesë e tij.

Prandaj me të njëjtin skepticizëm që shohin të sprovuarit iu qasen edhe rioshëve të çjerrur që rreken të marrin vëmendje e mbështetje me lloj-lloj trukesh rrjetesh sociale a studiosh televizive.

Shqiptarët tashmë janë bërë pragmatikë. E dinë se të qënit politikan në këtë vend nuk ka të bëjë me ndërtimin e politikave zhvillimore e aq më pak me idealizmin. Është veçse një profesion fitimprurës që po bëhet gjithnjë e më ‘trend’ edhe mes brezave të rinj. Edhe pak vite po të ushtrohet, siguron standarde të kënaqshme për ata vetë dhe kë i rrethon. E kjo s’ka si të mos jetë e lakmueshme, kur opsionet e tjera të punësimit vënë në diskutim mbijetesën.

Mbi të gjitha e fatkeqësisht, shqiptarët nuk çuditen më. Zhgënimi është aq i thellë, sa po humbim aftesinë të reagojmë, të imagjinojmë të mirën në këtë vend, ku ëndrrat heshten dhe burgosen, hiç më pak se në diktaturë.

©️Copyright Gazeta DITA

Ky artikull është ekskluziv i Gazetës DITA, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar DITA dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016