Pushteti i padukshëm

Nga Migena Aleksi

Zyrtarisht, Belinda Balluku është e shkarkuar nga detyra e Ministres së Infrastrukturës dhe Energjisë. Në zyrën e saj qëndron një tjetër emër. Por për drejtuesit e agjencive më të rëndësishme nën këtë varësi, hierarkia nuk ka ndryshuar fare.

Një investigim i emisionit Fiks Fare zbulon se si infrastruktura njerëzore e emërimeve, punësimeve dhe vendimmarrjes vazhdon të kontrollohet nga i njëjti person. Gazetarët e Fiks Fare, të prezantuar si punëkërkues, depërtuan në zyrat e titullarëve të institucioneve kyçe, nga Aviacioni Civil dhe Inspektorati Teknik, te Emergjencat e Minierave dhe AKBN-ja.

Dëshmitë e mbledhura janë të qarta për nga natyrshmëria me të cilën pranohet varësia: ​”Ushtarët zëvendësohen kollaj, por mbretëresha nuk zëvendësohet dot,” shprehet një nga drejtuesit. Të tjerë pranojnë hapur se ministri i ri në detyrë është thjesht një propozim apo emërim i vetë Ballukut, ndërsa këshilltarët e saj vazhdojnë të mbajnë zyrat dhe të merren me PR-in e saj personal brenda mureve të ministrisë.

Në çdo bisedë të regjistruar, emri i saj funksionon si pasaportë kalimi. Një “sinjal” nga Bela ose statusi si “mikesha e mbretëreshës” mjafton për të hapur dyert e punësimit dhe vendimmarrjes.

E përballur me këto fakte në një dalje private jashtë zyrave zyrtare, përgjigjja e vetë Belinda Ballukut nuk ishte një sqarim institucional, por një sulm direkt me etiketime ndaj gazetarëve.

​Përplasja mes letrës dhe realitetit i kapërcen kufijtë e një emisioni televiziv.  Dëshmitë e titullarëve konfirmojnë se autoriteti i një personi nën hetim për afera në shifra të jashtëzakonshme vazhdon të përcaktojë fatet e institucioneve shtetërore.

Kjo çështje kërkon ndërhyrjen e drejtësisë, vendimet e së cilës janë sfiduar hapur. Cili është kufiri mes një posti zyrtar dhe ushtrimit të paligjshëm të pushtetit?

DITA