Putin thirrje Evropës: Nëse doni gaz, hapni ‘Nord Stream 2’

Presidenti Vladimir Putin deklaroi se Rusia nuk kishte ndonjë lidhje me krizën energjetike të Evropës.

Sipas tij, nëse Bashkimi Evropian dëshiron më shumë gaz, ata duhet të heqin sanksionet që pengojnë hapjen e gazsjellësit “Nord Stream 2”.

Lajmi u bë i ditur nga agjencia “Reuters”, duke cituar fjalën e Putin-it pas samitit të Organizatës së Bashkëpunimit të Shangait në Uzbekistan.

Udhëheqësi rus fajësoi atë që ai e quajti “agjendën e gjelbër” për krizën energjetike dhe këmbënguli që Rusia të përmbushë detyrimet e saj energjetike.

“Përfundimi është, nëse keni një dëshirë, nëse është kaq e vështirë për ju, thjesht hiqni sanksionet ndaj Nord Stream 2, që është 55 miliardë metra kub gaz në vit, thjesht shtypni butonin dhe gjithçka do të fillojë”, theksoi Putin.

“Nord Stream 2”, i cili shtrihet në shtratin e Detit Baltik pothuajse paralelisht me “Nord Stream 1”, u ndërtua një vit më parë.

Por autoritetet gjermane vendosën të ndalojnë punimet vetëm disa ditë përpara se Rusia të dërgonte trupat e saj në Ukrainë më 24 shkurt.

Çmimet evropiane të gazit u dyfishuan nga fillimi i vitit mes një rënie në furnizimet ruse.

Rritja e çmimeve të këtij viti ka shtypur konsumatorët tashmë në vështirësi dhe ka detyruar disa industri të ndalojnë prodhimin.

Evropa ka akuzuar Rusinë për armatosje të furnizimeve me energji në shenjë hakmarrjeje për sanksionet perëndimore të vendosura ndaj Moskës.

Rusia ka ndërprerë furnizimin me gaz për disa vende, duke përfshirë Bullgarinë dhe Poloninë, sepse ata refuzuan të paguanin në rubla.

a.m/dita