Ministri i Bujqësisë dhe i Zhvillimit Rural, Andis Salla, në një konferencë për shtyp prezantoi skemën kombëtare të mbështetjes në bujqësi. Skema Kombëtare 2026 nuk do të përfshijë mbështetjen e fermerëve me naftë.
I pyetur nga gazetarët për skemën e naftës falas në bujqësi, ministri i Bujqësisë dhe i Zhvillimit Rural shpjegoi se kjo masë do të shtrihet në masat e tjera të skemës kombëtare, përfshirë edhe kompensimin që do të përfitojnë fermerët nga kompensimi 10% i TVSH me qëllimin uljen e kostos së prodhimit.
“Skema e naftës është një skemë për uljen e kostos së prodhimit dhe është mbështetur me buxhet të drejtpërdrejt për fermerin. Skema e re kombëtare është një skemë gjithëpërfshirëse ku mbulohen të gjithë fermerët në uljen e kostos së prodhimit, qoftë me autofaturimin e TVSH dhe masat e tjera në një buxhet prej 5,2 mld lekë. Nëse skema vjet ishte 4,6 mld lekë sot e kemi 5,2 mld lekë skemën kombëtare dhe kjo do të sjellë ulje të kostove për fermerët”.
Skema për përfitimin e naftës falas filloi zbatimin për herë të parë në 2021. Në vitin e saj të parë aplikuan 46,912 fermerë për të përfituar naftë falas. Ndërsa në vitin e dytë të zbatimit numri i aplikimeve arritën në 54,691.
Në 2022 aplikimet më të larta ishin në qarkun Fier me 16,897 kërkesa dhe Korçë me përkatësisht 10,974, Berat 6,878 dhe për qarkun Elbasan pati 6,696.
Në skemën kombëtare ministri Salla tha se për herë të parë përfshihet mbështetja për dosët në sektorin e derrave. Mbështetja do të jetë 7 mijë lekë për dosë në një fermë me jo më pak se 5 dosa.
Ministri Salla tha se për herë të parë fermerët do të përfitojnë 10 mijë lekë për çdo ha, për fermat me mbi 3 ha.
Skemat me subvencionet direkte të bujqësisë nisën zbatimin në vitin 2022, të cilat zëvendësuan heqjen e skemës së kompensimit 6% të TVSH-së te agroindustria, vendosjen e 10% të TVSH-së te inputet bujqësore nga zero që ishin më parë.
Monitor.al
