Për të lehtësuar fluksin e lartë të pacientëve më të cilin përballet çdo ditë, në QSUT do të ngrihet edhe një spital ditor, me një kapacitet prej 60 shtretërish.
Puna për ndërtimin e këtij spitali tashmë ka nisur dhe pritet që hapja e tij të bëhet brenda muajit shkurt 2024.
Konfirmimin e ka bërë vetë ministrja e Shëndetësisë, Ogerta Manastirli, teksa ka ndjekur nga afër punimet që po kryhen aktualisht.
Ngritja e kësaj strukture do të shmangë pritjet dhe radhët e gjata në dyert e shërbimeve të QSUT-së.
Pacientët do të marrin trajtimin e nevojshëm ditor dhe më pas do të mund të largohen për në shtëpi.
Sipas autoriteteve të shëndetit në këtë spital ditor do të ofrohet edhe shërbimi i hemodializës për të sëmurët që vuajnë nga veshkat, ai toksikologjisë, hematologjisë, etj.
“Sapo kemi hapur një tjetër kantier të rëndësishëm në zemër të Qendrës Spitalore Universitare “Nënë Tereza”, një projekt unik, për të patur për herë të parë një spital të ri ditor, me kapacitet 60 shtretër, i cili do të jetë në mbështetje të super Spitalit Qendror në QSUT. Kjo strukturë e re do të ketë gjithashtu edhe shërbimin e hemodializës, të toksikologjisë, si dhe do t’i shërbejë pacientëve që marrin trajtime ditore në qendrën më të madhe spitalore në vend”, konfirmoi ministrja Manastirliu.
p.k\dita
