Raketa ruse goditi kompleksin ku banonte, ambasadori i Shqipërisë në Kiev: Isha i vetmi diplomat në godinë

Ambasadori i Shqipërisë në Ukrainë, Ernal Filo, ka rrëfyer momentet e frikshme të sulmit masiv rus mbi Kievin, gjatë të cilit u godit edhe kompleksi i rezidencave ku ai banon.

Në një prononcim për News24, diplomati shqiptar deklaroi se sulmi i nisur mbrëmjen e kaluar ishte më i gjati, më i madhi për nga përdorimi i dronëve dhe raketave dhe më shkatërruesi që nga fillimi i luftës në vitin 2022.

Ai bëri të ditur se shërbimet e emergjencës ukrainase mbërritën menjëherë në vendngjarje dhe arritën të shuajnë flakët në ambientet e prekura.

Pas përfundimit të sulmit, ambasadori konstatoi dëmet në ndërtesë, e cila sipas tij mbetet ende e banueshme.

“Që nga hapja për herë të parë të Ambasadës në Ukrainë vitin e kaluar, sulmi i mbrëmshëm, që filloi rreth orës 22:00 dhe përfundoi me 6:30 të mëngjesit, ishte sulmi më i gjatë, më i madh në sasi të përdorimit të dronëve dhe raketave, nga Iskander e deri tek Oreshnik, dhe më shkatërrues që nga fillimi i konfliktit 2022. Në orët e para të mëngjesit, një nga raketat e përdorura, goditi edhe kompleksin e rezidencave ku banoj unë. Goditja ishte aq e fortë sa që eksplozivi depërtoi edhe në vendstrehimin e godinës përveç dëmeve në fasadë. Ishte një përjetim jo i lehtë për mua si i vetmi diplomat në godinë por edhe për banorët e zonës përreth. Shërbimet e emergjencës erdhën menjëherë dhe bënë shuarjen e flakëve në ambientet e vendstrehimit dhe zonën ku ndodhi goditja. Me përfundimin e sulmit rreth orës 6.30 të mëngjesit, arrita të ngjitem dhe të shoh dëmet e shkaktuara. Godina është goditur në fasadën e jashtme por është ende e banueshme. Autoritetet ukrainase më kanë kontaktuar dhe më kanë ofruar asistencë nëse do të jetë e nevojshme dhe solidaritet të plotë. Këto sulme që po terrorizojnë njerëz të pafajshëm në shkelje flagrante të të Drejtës Ndërkombëtare, duhet të ndalen dhe një paqe e drejtë dhe e qëndrueshme duhet të arrihet”, tha ai.

j.l./ dita