Rama i përgjigjet deputetit britanik: Shpresoj që vizita juaj në Shqipëri t’ju frymëzojë të luftoni për ide, në vend që të luftoni kundër njerëzve

Kryeministri Edi Rama ka vijuar me replikat online me deputetin e Britanisë së Madhe, Nigel Farage lidhur me çështjen e shqiptarëve atje. Në postimin e tij të fundit, Rama shprehet se numri i shqiptarëve në Britani është mbi 300 mijë.

Kreu i qeverisë shton së këta shqiptarë janë njerëz që japin mësim në Britani, punojnë në ndërtim dhe kujdesen për të moshuarit dhe të sëmurët atje.

Duke iu drejtuar deputetit britanik, Rama thotë se pretendimet e tij bien, ndërsa e pyet “pse është kaq e vështirë të pranosh se ke gabuar, pa zvarritur në baltë një komunitet të tërë njerëzish të shkëlqyer dhe punëtorë që i shërbejnë atdheut tënd me dinjitet sikur të ishte i tyri?”.

Kryeministri thotë se shpreson që vizita e ardhshme e tij në Shqipëri ta frymëzojë të luftojë për ide, në vend që sipas Ramës, të luftojë kundër njerëzve. Në fund të postimit të tij, ai thotë se është gati për të vendosur një datë për vizitën e Farage në Shqipëri, por si fillim thotë se duhet të diskutojnë, jo “fantazitë e deputetit”.

POSTIMI I PLOTË:

Nigel, Nigel, Nigel… Nga “një kriminel në pesëdhjetë shqiptarë”, pretendimi juaj tani është shndërruar në: “Ndoshta është një në tre, ndoshta një në katër, nuk e di…”

Vërtet?! Nuk e dini?

Dhe kjo vjen pasi thoni se i keni kontrolluar dy herë shifrat?

Unë tashmë ju drejtova te të dhënat e vetë The Telegraph (me bujari, mund të shtoj) duke zgjedhur referencën tuaj, megjithëse një referencë vetëkontradiktore. Por dukeni të vendosur të vazhdoni në gabim.

Pra, më lejoni t’ju ndihmoj me sqarime të mëtejshme. Sipas të dhënave nga Ambasada e Shqipërisë në Mbretërinë e Bashkuar, një institucion që merret me njerëz të vërtetë, jo me fraza të Brexit, numri i shqiptarëve në vendin tuaj nuk është 53,000, siç sugjeron fillimisht The Telegraph. Në fakt, në të njëjtin artikull, ajo pranon, dhe citoj, “analiza ka të ngjarë ta ketë nënvlerësuar madhësinë e popullsisë shqiptare”. Pastaj spekulon se shifra mund të jetë deri në 140,000.

Në realitet, z.@Nigel_Farage

E di çfarë? Shifra është mbi 300,000, vëlla! Këta janë njerëz që mësojnë fëmijët tuaj, që ndërtojnë shtëpitë tuaja, që kujdesen për të moshuarit dhe të sëmurët tuaj. Ata nuk janë mish për dhëmbët e propagandës së shpëlarjes së trurit pas Brexit-it. Ata janë pjesë e strukturës së gjallë dhe që merr frymë e shoqërisë suaj.

Edhe pa kontrolluar moshën, gjininë apo statusin socioekonomik, pretendimet tuaja bien. As një në pesëdhjetë. Dhe sigurisht jo një në tre ose katër. Këto nuk janë statistika, janë taktika frikësimi të maskuara si të dhëna. Pra, më lejoni t’ju pyes qartë: pse është kaq e vështirë të pranosh se ke gabuar, pa zvarritur në baltë një komunitet të tërë njerëzish të shkëlqyer dhe punëtorë që i shërbejnë atdheut tënd me dinjitet sikur të ishte i tyri?

Britania është tashmë e madhe dhe jo më pak për shkak të diversitetit, qëndrueshmërisë dhe forcës së saj shumëkulturore. Një komb në stres politik post-traumatik nuk ka nevojë për kurbane. Nuk ka nevojë për goditje të kota. Dhe sigurisht nuk ka nevojë për mite në vend të fakteve.

Shpresoj sinqerisht që vizita juaj e ardhshme në Shqipëri t’ju frymëzojë të luftoni për ide, në vend që të luftoni kundër njerëzve – në frymën e traditës së madhe liberale për të cilën vendi juaj ka qëndruar prej kohësh. Pres me padurim t’ju mirëpres në vendin tonë të bukur si mysafir nderi. Por, përpara se të vini për të shijuar diellin e vërtetë dhe mikpritjen e sinqertë, a mund të biem dakord të diskutojmë faktet, jo fantazitë tuaja pas së vërtetës? Le të caktojmë datën.

Nigel, Nigel, Nigel…

From “one criminal in fifty Albanians,” your claim has now spiraled into: “Maybe it’s one in three, maybe one in four, I don’t know…”

Really?! You don’t know?

And this comes after you say you double-checked the numbers?

I already pointed you to The… https://t.co/cvgBe4ftys pic.twitter.com/aCWZKSwpZc

— Edi Rama (@ediramaal) July 1, 2025

j.l./ dita