INTERVISTA / “Jemi fëmijë të të njëjtit Zot”, gazeta greke për Ramën: Nuk ngjan si kryeministër, duket si yll rroku

Edi Rama ka dhënë një intervistë për gazetën greke “Ekathimerini”, ku u pyet për disa tema të raporteve mes dy vendeve fqinje.

“Ne kemi një marrëdhënie fantastike me Greqinë dhe personalisht me Kyriakos Mitsotakis, i cili di të flasë dhe di të dëgjojë” – thotë ai në intervistën që u shpërnda në shqip, nga zyra e tij e shtypit.

Pjesë nga intervista:

Kryeministri shqiptar flet për Kathimerini për artin, politikën, lidhjet dypalëshe dhe “gjemba” si çështja e zonave detare, të cilat do të çohen në Hagë.

Afro 2 metra i gjatë, me fizikun e një ish-sportisti, i veshur me atlete dhe xhaketë lëkure, Edi Rama ngjan më shumë si një yll roku se sa një kryeministër. E gjithë sjellja e tij, në fakt, është “jokonvencionale”.

Kathimerini u takua me liderin shqiptar të dielën në fillim të këtij muaji në Sallën Zappeion në qendër të Athinës, ku ai dhe kuratorja Katerina Koskina po vendosnin një instalacion masiv të veprës së tij artistike.

Ftesa për të hapur një ekspozitë në Athinë u bë nga kryeministri grek Kyriakos Mitsotakis dhe ministri i jashtëm Nikos Dendias pasi ata vizituan Ramën në zyrën e tij në Tiranë dhe u mrekulluan me artin që zbukuronte muret e saj dhe tavolinën e tij.

Ekspozita në Zappeion, e cila zgjat deri më 31 mars, përfshin piktura në fletë letre A4 dhe një seri punimesh qeramike që ai thotë se i ka bërë në punishten e një miku.

Lidhjet me Greqinë

Në Greqi, thotë Rama, “ndihem si në shtëpi për sa i përket peizazhit, njerëzve dhe ngrohtësisë së saj”, por Greqia pati “fatin e mirë të bëhej anëtare e Bashkimit Europian, të kishte liderë si Karamalis, Papandreu dhe Mitsotakis dhe të priste Lojërat Olimpike”.

Për sa i përket perspektivës së Shqipërisë në BE, Rama thotë se është një “proces i vështirë”.

“Procesi i anëtarësimit është shumë më i komplikuar dhe më kërkues se sa ishte për vendet e tjera në të kaluarën. Le të themi se është çështje subjektiviteti politik, ndryshim kriteresh. Gjithçka është shumë më e rreptë tani dhe disa vende nuk do të ishin anëtarësuar nëse do të aplikonin sot”, thotë Rama, që madje sugjeron se Greqia, kishte “mashtruar” për t’u bërë anëtare e bllokut.

Mes dy fqinjëve ka edhe çështje të pazgjidhura, kryesisht ajo e zonave detare dhe minoritetit grek në Shqipëri. Për të parën, Rama thotë se të dyja palët “kanë rënë dakord të mos bien dakord dhe çështja do të zgjidhet nga Gjykata Ndërkombëtare e Hagës”.

Për të dytën, Rama thotë se “populli gjithmonë gjen një mënyrë për t’i zgjidhur gjërat”.

“Ne kemi qenë gjithmonë afër. Na ndau përkohësisht komunizmi dhe pas rënies së tij pati një valë emigracioni nga vendi ynë në vendin tuaj që shkaktoi shqetësime, por me kalimin e kohës kjo u bë një dobi reciproke, si për vendin tuaj ashtu edhe për timin. Njerëzit, siç thashë më herët, gjithmonë gjejnë një mënyrë për t’i zgjidhur gjërat. Por ka politikanë që po i shërbejnë agjendave të tyre dhe kështu lidhjet dypalëshe nuk përcaktohen nga marrëdhëniet njerëzore por nga lidershipet, dhe veçanërisht kur flasim për vende fqinje.

Zhvillimet rajonale

Biseda jonë shkon te ndikimi i pushtimit rus të Ukrainës në tabelën rajonale të shahut dhe mundësinë e shpërthimeve të reja të tensionit në Ballkan.

“Njerëzit thonë se ne prodhojmë më shumë histori në Ballkan se sa jemi në gjendje të konsumojmë. Unë jam optimist për Ballkanin, megjithatë, veçanërisht nëse gjejmë një mënyrë për të punuar së bashku dhe aq më tepër për të hyrë nën ombrellën e BE-së.

Ne kemi problemet tona, natyrisht, mosmarrëveshjet tona dhe truket tona, por të tillë jemi – përndryshe, do të ishim Beneluksi. Gjyshja ime kishte një fjalë të mirë: Sa më i lumtur fqinji juaj, aq më e lumtur është shtëpia juaj”.

j.l./ dita