Rama: Fitore dehëse, ndihem i vogël, turi falenderues do nisë nga Shkodra

Kryeministri Edi Rama pas fitores së thellë në zgjedhjet vendore thotë se ndihet shumë i vogël përballë kësaj fitoreje.

Në një komunikim për gazetarët, Rama tha se do nisë turin e falënderimeve nga Shkodra.

“Kjo është një fitore shumë e madhe për t’u festuar. Vetë ndihem shumë i vogël përballë hartës së mbushur me ngjyrat e fitores së kandidatëve tanë nga Tropoja në Konispol. Kam dhe besoj kemi të gjithë nevojë të ruhemi nga era e fortë dehëse e një fitoreje si kjo.

E kam të nevojshme të shkoj sa më shpejt në Shkodër për të nisur nga qyteti më i bekuar nga zoti dhe më i keqtrajtuar nga robi, një tur falënderimi në të gjithë Shqipërinë.

Nuk dua ta harrojë askush se këto ishin zgjedhje vendore, patjetër me dimension politik të imponuar nga hijet e së shkuarës që tentuan ta tërhiqnin këtë vend mbrapa dhe i shikon këto zgjedhje si aksion revolucionar si përmbysje ndaj qeverisë”, tha Rama.

Rama ka dhënë edhe një mesazh falënderimi për të gjithë skuadrën e PS por më së shumti zgjedhësit. Kreu i qeverisë u ndal edhe tek ata që nuk votuan pasi nuk kapërcenin dot ideologjinë  tyre apo bindjen e tyre politike.

Në këtë formë, Rama shpjegoi edhe pjesëmarrjen e ulët në zgjedhjet e 14 majit, në të cilat opozita u braktis nga votuesit.

“Nuk dua t’i ngrij askujt buzëqeshjen legjitime të fitoreve prandaj dua të gjithë ta dinë, kryebashkiakët tanë, deputetët, drejtuesit politik u jam tejet falenderuar për përpjekjet e tyre dhe jam admirues për punën e tyre.

Falënderoj patronazhistët e palodhur dhe aktivistët e pa epur pa të cilët makinerisë sonë elektoralë do u mungonin shumë kuaj fuqi. Falënderimi më i madh u shkon zgjedhësve, që na votuan ose na votuan për herë të parë.

Dua ta falenderoj nga zemra çdo zgjedhës të djathtë, nga ata që e dëgjuan mesazhin tim për të mos dalë fare në votime për të mos kapërcyer ylberin politik. U jam mirënjohës. Të tjerëve atyre që nuk ja dolën të dalin nga e këneta e së shkuarës u them atyre që më vjen keq po atje ka vetëm të shkuar, jo të ardhme.

Për mua ky rezultat është mesazh i jashtëzakonshëm”, tha ai.