Rama mbledh grupin e PS: Fitorja e këtyre zgjedhjeve përcakton të ardhmen e vendit

Kryeministri Edi Rama mblodhi sot grupin parlamentar të Partisë Socialiste në selinë e Kuvendit.

Në një komunikim të hapur me mediat Rama vlerësoi para deputetëve rëndësinë e zgjedhjeve të 11 majit, të cilat siç tha zhvillohen në një kontekst gjeopolitik shumë të favorshëm për Shqipërinë dhe të ardhmen e saj në BE.

Sipas kryeministrit Rama, rezultati i zgjedhjeve të 11 majit ka një peshë të madhe mbi të ardhmen e vendit.

“Unë besoj që qysh se unë kam privilegjin të udhëheq këtë forcë politike dhe me të gjitha zgjedhjet e derisotme, 9 të tilla në asnjë prej tyre pesha e gjeopolitikës nuk ka qenë e pranishme sic është në këto zgjedhje. Këto zgjedhje zhvillohen në një kontekst dyfish të jashtëzakonshme. Njëri është konteksti i marrëdhënieve me BE dhe i BE me BP dhe tjetri është konteksti i anëtarësisë sonë në aleancën euratlantike dhe sigurisë në tërësi

Zgjedhjet e 11 majit nuk janë aspak të zakonshme dhe rezultati i 11 majit është më shumë sesa rezultat i partive politike, në rastin tonë është më shumë sesa fitore e PS në vetvete.

Për ne si familje politike dhe për flamurin tonë ka qenë e rëndësisë së veçantë që të fitojmë zgjedhjet, por më 11 maj rëndësia e fitores së zgjedhjeve dhe vetë rezultati i zgjedhjeve kanë një peshe mbi të ardhmen e afërt të vendit shumë më të madhe sesa ç’kanë pasur në zgjedhjet e mëparshme, 9 herë me radhë”, tha Rama.

Rama tha gjatë fjalës së tij se i duhet në zgjedhjet e 11 majit mandati më i fortë ndonjëherë që të finalizojnë brenda këtij 10-vjeçari anëtarësimin në BE.

Sipas tij, vetëm me anëtarësimin në BE Shqipëria dhe shqiptarët do të mund të kenë shtetin e së drejtës, ku institucionet e drejtësisë të mund të funksionojnë të pavarura siç po ndodh tani.

j.l./ dita