Rama: Më 11 maj fitore të thellë, t’u japim ‘noc rrokun madhështor’, mundësia për t’u bërë pjesë e BE është reale

Mandatin e katërt, kryeministri Edi Rama thotë se synonin një fitore edhe më të thellë se ajo e 2021, kur siguroi 74 mandate. Nga një takim me asambletë socialiste të Kavajës dhe Vorës, kryesocialisti Rama ironizoi koalicionin e opozitës, duke thënë se më 11 maj do i japin një ‘noc rrok madhështor’.

“Ngaqë më kanë dëgjuar mua që thoja noc rrokun, më vënë ca prog false dhe më shkruajnë noc rrokun do marrës. Më 11 maj duhet tu prezantojmë atyre një noc rrok madhështor. Duhet të më ndihmoni që ta realizojmë këtë, që atyre ti çojmë noc rrokun, po një noc rrok aq madhështor sa të thonë ca i bëmë vetes që zgjuam noc rrokun”, tha Rama.

Të gjithë retorikën politike për fushatën e 11 majit, kreu i qeverisë e ka fokusuar tek integrimi në BE, duke kërkuar votën për një mandat të katërt që mos të ndërpritet puna për t’iu bashkuar familjes europiane.

“Sikur ata të thonë po mirë ca bëhet me kë do punojmë, mjafton një rrëshqitje 6 mujor, e për të mos thënë më shumë dhe nuk arrihet më gjëja. Ajo mundësi mund të iki që aty, sepse ne kemi qenë gati për të hapur negociatat më para, por nuk ishin ata gati. Sot e kemi kalendarin në tavolinë të miratuar, na kanë thënë mbyllini negociatat në 2027 dhe ne do u marrim brenda në shtëpi. Kjo është diçka shumë e madh e për tu humbur ose vënë në diskutim nga vogëlsira të tipit jam me këtë parti, ose me atë parti, ose për Kavajën nuk është bërë kjo, po është bërë ajo. Ose shiko se kam inat me këtë, se ky s’më ka vlerësuar. Bëhet fjalë për Shqipërinë, për të gjithë, bëhet fjalë për të marrë një pasaportë të re”, tha Rama.

Mundësia që Shqipëria të integrohet në BE, Rama thotë se është reale, dhe kjo finalizohet vetëm me mbylljen e negociatave deri në vitin 2027.

“Sot janë krijuar kushtet që ne të hymë realisht në BE, si rrjedhojë e përputhjes së rrethanave tona të brendshme me rrethanat e BE. Për herë të parë mundësia për tu bërë pjesë e BE është reale. Kemi një kalendar për negociatat që është kalendari më i shpejtë në historinë e integrimit në BE. Nëse i mbyllim negociatat deri në 2027, të futemi dhe të bëhemi pjesë e BE”, tha Rama.

Ai nuk la pa përmendur me ironi mustaqet e Kujtim Gjuzit, duke thënë se ai është më simpatiku i koalicionit, ndërsa ata të tjerët nuk kanë as mustaqe.

j.l./ dita