Rama: Më shumë të ardhura për mjekët që punojnë më shumë, çfarë më tha ministri pas operimit

“Autonomia Spitalore, një hap i ri dhe vendimtar në reformën e shërbimit shëndetësor, më shumë përgjegjësi dhe më shumë të ardhura për mjekët që punojnë më shumë”, është kjo nisma e re e prezantuar nga kryeministri Rama. Në fjalën e tij Rama tha se spitalet e shërbimit publik orfrojnë sot kushte bashkëkohore, dhe se askush nuk mbetet pa shërbim shëndetësor në vend.

“Ka qenë një nga objektivat strategjikë që mjekëve në sistemin publik t’i jepnim një fuqi përtej pozicionit të rrogtarit dhe spitaleve ti jepnim mundësinë të administronin financat e tyre. Mjekët të paguhen me pagë nga shteti por cilido që punon më shumë të ketë mundësi të paguhet edhe më shumë. Nuk ka asnjë arsye sot që shërbimi public të mos jetë zgjedhje e parë edhe i natyre që e kanë mendjen te private.

Kur e nisëm këtë rrugë, është e vërtetë se private kishte kushte më të mira sot nuk është kështu. Kushtet sot janë të pakrahasueshme me strukturat më të mira private në disa struktura, ndërkohë që mjeket janë po ata. Cila është arsyeja për të shkuar në privat nëse në shtet mund të marrësh një shërbim po aq cilësor nga të njëjtët mjekë dhe në fund të kesh nxjerrë shumë më pak. Kush shkon në spital ka një opinion krejt tjetër.

Nuk them se nuk ka raste që janë të turpshme, apo nuk ka arsye për kritika, që të gjitha spitalet janë në këto kushte, por duan të thonë që në të gjitha rastet asnjë qytetar nuk ka sot asnjë arsye të ndihet i braktisur, çdo qytetar e ka mundësinë të marrë shërbim dinjitoz. Kemi spitale që ofrojnë kushte dhe shërbim dinjitoz. Sot jemi në një fazë tjetër, hyjmë në kapitull të ri. Brenda vitit synojmë të hapim në këto spitale që do marrin certifikatën e autonomisë menaxheriale edhe praktikën e dyfishtë.

Mjekët në këto spitale të shfrytëzojnë spitalin, aparaturat për të ofruar një shërbim ekstra që është me pagesë, ku 70% i merr mjeku dhe 30 % spitali. Dhe kështu hyjmë në Europë në kuptimin e konceptimit të sistemit publik, ku mjekët nuk janë thjesht rrogtarë, që të shohin mënyra si mund të ikin po ku të gjithë paguhen me paga dinjitoze”, u shpreh Rama.

Rama është i mendimit se kjo mund të ndikojë edhe në uljen e largimeve të mjekëve drejt Gjermanisë, siç ka ndodhur kryesisht. Madje, për këta të fundit ka pasur edhe një mesazh.

“Shpërblim i mjekëve në bazë të meritës, interesi për të punuar do jetë më i lartë, konkurrenca më e fortë, kush do të shkojë në Gjermani të na marrë të keqen, jam i bindur që vitet e ardhshme do të shënojnë një kthesë edhe në këtë aspekt. Në vizitën që bëra në Mynih më kanë takuar disa mjekë shqiptar që punojnë atje, jo stazhier, por shumë të mirë të pozicionuar që më kanë shprehur interesimin që të kthehen dhe të punojnë në sistemin publik shqiptar, ka shumë arsye për ta bërë këtë”, tha Rama.

Kryeministri Edi Rama u shpreh mjekësia sot është në një stad tjetër dhe këtë e konfirmon si pacient i QSUT.

Ai po ashtu ndau një detaj me ministrin e Jashtëm, i cili është operuar pak ditë më parë në repartin e sëmundjeve të brendshme dhe sipas Ramës kishte mbetur i habitur nga cilësia.

Rama tha se sot, çdo person pavarësisht situatës ekonomike ka mundësinë të marri një shërbim dinjitoz.

“10 vite më parë këto pamje do ishin thjesht dhe vetëm pamje të një dëshirë, të një ëndrre që dukej absolutisht e pamundur të realizohej në një kohë relativisht të shkurtër. Sot jemi në një stad krejt tjetër dhe këtë e konfirmoj edhe si pacient i QSUT-së dhe jo më larg se pardje në mos gabohem, ministri i Jashtëm bëri një operacion në Spitalin e ri të Sëmundjeve të Brendshme më shkruan dhe mesazh që nuk e besoj dot akoma që ky është spitali ynë në Tiranë, dhe kështu dëshmojnë shumë njerëz që kanë kaluar nga ai spital që është për nga kushtet dhe ekspertiza e mjekësve, është ndër spitalet më të mira të Europës. Patjetër që më vjen mirë ta kujtoj se ­çfarë më tha një nga operuesit e mi dhe po e citoj se ai është demkrat 24 karat, ishte nder të të kishim në sallën e operacionit  më tha, për herë të parë në shërbimin shëndetësor një kryeministër. I them këto për të sjellë në aktualitetin e kohës së sotme këtë përpjekje pa të cilën do ishte e pamundur të mblidheshim sot për kartat e autonomisë spitalore”, tha ai.

Kujtojmë se kreu i qeverisë iu nënshtrua një ndërhyrjeje për heqjen e  apandesitit më 17 prill të vitit të kaluar.

j.l./ dita