Kjo vizitë ishte paralajmëruar edhe më herët nga kreu i qeverisë, ku ka sqaruar se qëllimi është për të thelluar bisedimet për bazën e NATO në Durrës. Ky projekt ka të bëjë me instalimin e një baze detare të NATO-s në portin e ri të Durrësit në Porto Romano, sipas së cilit ka ngjallur shumë interes dhe dëshirë.
Aktualisht po ndërtohet baza taktike ajrore e NATO-s në Kuçovë, e cila është tërësisht financim i huaj, ndërkohë që për sa i përket portit, ajo do të financohet nga shteti shqiptar, pjesa komercale, siç vetë Rama e bëri me dije, duke sqaruar se është ftuar NATO, që të marrë pjesë në një bashkëfinancim për pjesën ushtarake.
Kryeministri Rama gjithashtu në konferencën për mediat me Stoltenberg tha se Shqipëria është krenare për rolin e saj në rajon dhe theksoi se është e rëndësishme një dialog i përbashkët për të gjithë vendet e Ballkanit Perëndimor. Rama tha se është e nevojshme që Kosova të përfshihet në partneritetin për paqen.
“Është kënaqësi e madhe që jam këtu dhe të ndaj me ju disa opinion pas Samitit të Madridit, që ishte një moment historik për Aleancën në këtë moment shumë të rëndësishëm. Jam krenar që Kuvendi i Shqipërisë u bë një prej të parëve për ratifikimin e protokollit të anëtarësimit të Finlandës dhe Suedisë. Ne qëndrojmë në solidaritet të plotë me Ukrainën dhe është e padiskutueshme mbështetja jonë për integritetin territorial dhe sovranitetin e Ukrainës. Ne duhet të parandalojmë çdo përshkallëzim dhe çdo ndikim të keq që të kthehet në problem për rajonin tonë. Në kapacitetin tonë si vend i NATO dhe vend kandidat për në BE ne do të vazhdojmë ta luajmë rolin tonë të paqes dhe stabilitetit në rajon, tha Rama.
a.m/dita
