“S’kam mbrojtur Erion Veliajn, ai duhet t’i nënshtrohet gjithë procesit të tij”. Kështu u shpreh mbrëmë në Top Story, kryeministri Edi Rama, përballë moderatores Grida Duma si dhe gazetarëve Alban Dudushi dhe Robert Rakipllari.
“Unë kam thënë që periudha e heshtjes ka mbaruar. Pesë vjet heshtje ishin boll, SPAK-u është ngritur në këmbë. Nuk është më një bebe që ka nevojë për heshtje edhe kur bën ndonjë gabim. Ka gjithë kapacitetin e vet, e ka pavarësinë nga të gjitha”, tha Rama duke iu referuar pyetjes së gazetarit Alban Dudushi se pse foli dhe komentoi vendimin e SPAK në rastin e arrestimit të Erion Veliajt.
“Pesë vjet heshtje nuk kanë qenë pesë vjet miratim i çdo gjëje dhe unë e kam thënë gjithmonë që jo çdo gjë është perfekt. Ka probleme, me patjetër gabojmë, ne s’jemi ne perfekt dhe kjo është e vërtetë.
Qeveria e Shqipërisë është institucioni më i vjetër i shtetit shqiptar se është gjëja e parë që ka lindur, ka 100 e kusur vite traditë dhe prapë ne gabojmë. Ata janë një institucion i sapolindur që s’kanë as traditë, s’kanë asgjë. Kanë marrë një pushtet që, s’e kanë pasur kurrë njerëzit e drejtësisë në Shqipëri.
Nuk jam ballafaquar unë me këtë çështje si çështje që kishte të bënte me kryetarin e bashkisë. Unë jam ballafaquar me çështje që kishte të bënte me ca njerëz të cilët, unë i gjeta në këtë proces për shkak komplet tjetër, artistë, të rinjë, njerëz që s’kanë lidhje me politikën, për të cilët unë dëgjova krejt rastësisht dhe pastaj fillova të thellohem.
Dëgjova për histori të pabesueshme, kapje shtirjesh, marrjesh telefonash dhe këtu ishte momenti që thashë tani këtu, Stop. Por ama kjo as nuk nënkupton asnjë lloj ndikimi për personin konkret, sepse s’kam thënë asgjë. Erioni është në procesin e tij dhe duhet t’i nënshtrohet gjithnjë procesit pavarësisht të tërave, as nënkupton që tani se u teprua kjo punë dhe tani ne duhet të marrim mbrapsht shpatën, se ajo shpatë sa të jem unë këtu nuk merret mbrapsht”, vijoi Rama.
