Rama publikoi pamjet e familjes së emigrantëve që mori fletën e votimit, Celibashi: Nuk e ka bërë ai foton

Kreu i KQZ-së, Ilirjan Celibashi ka komentuar postimin e Kryeministrit Edi Rama, i cili publikoi foton e një familje emigrante shqiptare që ka marrë zarfin me fletën e votimit.

Celibashi theksoi se foto nuk është bërë nga Kryeministri, por nga vetë familja që e ka bërë plublike, duke shtuar se në imazh nuk duket fleta e votimit, por vetëm zarfi.

“Kryeministri e ka përdorur, është punë e tij”, theksoi kreu i KQZ-së, duke shtuar se publikimi i fotos është pozitive sepse inkurajon votuesit që presin fletën e votimit.

“Jam i sigurt që se ka bërë Kryeministri, e kanë bërë vetë ata votuesit. E kanë postuar ata, kjo në fakt është pozitive sepse është inkurajuese për votuesit që presin. Ka pasur skepticizëm.

Ajo nuk është vota, por evidentimi i faktit që ka mbërritur fleta. E ka publikuar familjari aty sepse nuk besoj se ka shkuar vetë Kryeministri i ka bërë foto asaj familjes. Kryeministri e ka përdorur, është punë e tij, e ka konsideruar se ka benefit për të nga pikëpamja elektorale, a e ka konsideruar që ky proces u realizua. Pyesni Kryeministrin, nuk ka paligjshmëri as nga ana e qytetarit dhe as Kryeministrit. Ndoshta edhe KQZ mund ta bënte, ta ripostonte në rrjetet e institucionit”, tha ai.

Celibashi ka treguar se si do të njoftohen emigrantët në diasporë për mbërritjen e zarfeve me fletët e votimit.

Celibashi theksoi se zgjedhësit do të njoftohen përmes lënies së një shënimi nga postierët, mesazhi në telefon apo në e-mail.

“Nëse nuk do të kenë mundësi që fleta e votimit do tu shkojë në banesë, mesazhi do të përmbajë edhe vendin dhe orën e zyrës ku mund të shkojnë ta tërheqin”, theksoi Celibashi.

Sipas kreut të KQZ, kjo e ndihmon procesin dhe rrit shanset e shpërndarjes 110% të fletëve të votimit tek votuesit.

“Zgjedhjet do të njoftohen jo vetëm nëpërmjet lënies së një shënimi nga postierët pasi kuptuam që jo në të gjitha shtetet funksionon kështu, shtete të ndryshme edhe pse janë nën 1 kompani aplikojnë standarde të ndryshme të njoftimit të zgjedhësve për dërgesat që u vijnë.

Zgjedhësve do u komunikohet me SMS telefonik ose në e-mail se kur iu mbërrin fleta e votimit, dhe nëse nuk do të kenë mundësi që fleta e votimit do tu shkojë në banesë, mesazhi do të përmbajë edhe vendin dhe orën e zyrës ku mund të shkojnë ta tërheqin.

Kjo e ndihmon procesin dhe rrit shanset e shpërndarjes 110% të fletëve të votimit tek votuesit”, tha Celibashi.

Kreu i KQZ-së tha se mund të ketë shtyrje të afatit të shpërndarjes se zarfeve për votuesit jashtë vendit.

Celibashi tha se afati i cili ishte planifikuar për më 17 maj  shtyhet për shkak të kontrolleve të shtuara për të garantuar sigurinë e procesit.

j.l./ dita