Rama ‘shpjegon’ Paketën e Maleve

“Paketa e Maleve” është një nismë që synon të zgjidhë problemet e pronësisë të trashëguara nga ligji 7501, veçanërisht në zonat veriore dhe verilindore të vendit – u shpreh Kryeministri Edi Rama gjatë një takimi me përfaqësues të agroturizmit në Tiranë.

Kreu i qeverisë theksoi se kjo paketë do u japë mundësi qytetarëve që nuk kanë tituj pronësie të zhvillojnë pronat e tyre.

“Paketa e Maleve ka lindur nga nevoja për t’i dhënë drejtim një problemi shumë të madh, që e ka origjinën te ligji 7501 dhe te konflikti i shumë familjeve në zona të caktuara të vendit, kryesisht në veri dhe verilindje, që nuk e kanë njohur 7501 si një instrument të vlefshëm për tokën e tyre. Problemi i trashëguar është që këta njerëz e kanë të pamundur të kenë akses në financa dhe të ndërtojnë në mënyrë të ligjshme, sepse nuk kanë një titull pronësie”, tha kryeministri.

Me “Paketën e Maleve”, qytetarët mund të aplikojnë në bashki për leje ndërtimi, ndërsa certifikatën e pronësisë e marrin vetëm pasi të kenë përfunduar investimin. Rama sqaroi se nëse gjatë procesit paraqiten pretendime për pronësinë, çështja zgjidhet nga shteti dhe jo nga investitori.

“Në 45 ditë duhet të vijë një kundërshti e argumentuar. Nëse nuk vjen, lista kalon në Këshillin Bashkiak. Ky aplikim vlen vetëm për një gjë, vlen vetëm për të aplikuar për të marrë leje për një projekt. As nuk mund ta marrësh tokën ta shesësh, as nuk mund ta japësh me qira, as nuk merr titull pronësie.

Pasi miratohet projekti, ti ndërton. Vetëm pasi ke përfunduar ndërtimin, jo përpara, ti merr titullin e pronësisë. Nuk mund të gëzosh një titull pronësie pa e investuar atë tokë. Nëse në një kohë X, shfaqet dikush tjetër që pretendon të jetë pronari, shkon në gjyq dhe nëse ai fiton, ti nuk merresh me atë, por merret shteti. Kjo është trajektorja që ndjek kjo paketë. Është shumë pro biznes”, tha Rama.

Kryeministri prezantoi gjithashtu programin “Dyfisho Ndërmarrjen Tënde”, që synon të mbështesë bizneset e vogla dhe të mesme. Programi parashikon kredi me interesa më të ulëta se tregu, të garantuara nga qeveria, me një limit deri në 2 milionë euro.

“Ky projekt do të mbështet nga një linjë kredie e Bankës së Shqipërisë, e cila do të përpunohet nga bankat e nivelit të dytë në bazë të aplikimeve dhe do të garantohet nga qeveria shqiptare me një garanci sovrane dhe do të ketë një interes të kredisë më të ulët sesa kreditë komerciale. Plus që do të ketë një limit deri në 2 milionë euro. Nuk do të jetë e mundur të aksesohet nga kompanitë e mëdha, por do të aksesohet nga Start-Up, nga ndërmarrjet e vogla e të mesme, nga punishtet dhe agroturizmat që duan të rriten”, shpjegoi kryeministri.

Në fjalën e tij, Rama u ndal edhe te ndryshimet në ligjin për portet turistike, duke mbrojtur mundësinë që investitorët strategjikë të ndërtojnë marina pa kaluar në procedura koncesionare. Sipas tij, kjo bëhet për të shmangur burokracitë dhe vonesat që pengojnë investimet.

“Pati një alarm të ngritur në parlament dhe madje edhe në Bashkimin Evropian kur u deklarua se ne jemi vendi i parë dhe besoj i fundit kandidat në historinë e zgjerimit të BE-së që eksporton papastërti dhe helm nga kryeqyteti ynë në kryeqytete të tjera. U pretendua se qeveria po ndryshonte ligjin për t’u dhënë porte oligarkëve pa konkurrencë. Në fakt, ndryshimi është i nevojshëm për të shmangur pengimin, vonesën dhe zvarritjen e investitorëve që po investojnë në pronat e tyre bregdetare”, tha Rama.

Në prag të sezonit turistik, kreu i qeverisë u bëri thirrje bizneseve, veçanërisht në jug, të shmangin çmimet e larta dhe të përmirësojnë cilësinë e shërbimit.

“I ndërpret të ardhmen duke bërë lista, menura ose tabelën e çmimeve të dhomave me atë urinë për të fituar sot edhe atë që do fitosh nesër, faktikisht ti bën varrmihësin e investimit tënd. Është një tragjedi që i ka ndodhur, jo pak vendeve nga e cila duhet mësuar”, tha ai.

Rama theksoi rëndësinë e mikpritjes dhe të një turizmi cilësor, duke shtuar se Shqipëria duhet të synojë turistë që shpenzojnë më shumë, dhe jo turizëm masiv me konsum të ulët.