Raporti më i fundit i Kombeve të Bashkuara mbi Drogën dhe Krimin vë në dukje se prodhimi i kokainës jo vetëm ka arritur në nivele rekord, por janë zgjeruar edhe qendrat e trafikimit.
Në mënyrë të vazhdueshme ky raport evidenton se grupet kriminale shqiptare konsiderohen si lojtarë të rëndësishëm në tregun global të kokainës.
Vetëm në dekadën e fundit, rezulton se grupet shqipfolëse janë bërë lojtarët kryesorë në tregun e kokainës në Evropë, duke u mbështetur në një rrjet të gjerë bashkëpunëtorësh në mesin e diasporës shqiptare jashtë vendit dhe shpesh duke punuar në bashkëpunim me grupet kriminale italiane.
Në raportin e OKB-së thuhet se grupet shqiptare operojnë me shpërndarje në sasi të mëdha të kokainës në shumë pjesë të Evropës, veçanërisht në Mbretërinë e Bashkuar dhe Holandë duke krijuar marrëdhënie të drejtpërdrejta me furnitorët në Amerikën Latine.
“Ndërsa grupet shqiptare janë shumë aktive në dërgimin e kokainës nëpër Evropën Perëndimore, veçanërisht në portet e Belgjikës dhe Holandës, një sasi kokaine ka mbërritur edhe ne portin kryesor të Shqipërisë, atë të Durrësit”, specifikohet në raport.
Ndërsa tregjet më pak të eksploruara të kokainës në Evropën Lindore janë furnizuar kryesisht nga grupet kriminale shqiptare dhe serbe. Në veçanti grupet kriminale serbe kanë furnizuar për një kohë gjatë Ballkanin me kokainë nga Ekuadori thuhet në raport.
Autoritetet ligjzbatuese në Shqipëri kanë raportuar se për të trafikuar kokainën, grupet kriminale e fshehin lëndën narkotike edhe në automjetet me tonazh të rëndë përmes trageteve që vijnë nga Italia thuhet në raportin më të fundit të OKB për drogën dhe krimin.
Sipas gjetjeve, grupet kriminale shqiptare luajnë një rol të rëndësishëm në tregtinë e kokainës në Irlandë, ndonëse ky treg vazhdon të kontrollohet nga grupet kriminale irlandeze.
p.k. / dita
