Ndonëse rastet me Covid-19 janë shtuar ndjeshëm në vendin tonë gjatë javëve të fundit, autoritetet e shëndetit publik thonë se nuk ka vend për panik. Kjo pasi virusi që po qarkullon aktualisht nuk ka të njëjtën shkallë agresiviteti sikundër ndodhi tre vite më parë.
Sipas të dhënave të raportuara nga strukturat shëndetësore, bëhet e ditur se gjatë dy javëve të fundit paraqitet një incidencë më e lartë e rasteve pozitive me koronavirus, 1100-1200 raste në javë.
Por pavarësisht kësaj, Instituti i Shëndetit Publik bën thirrje që të aplikohet një dozë kujtese e vaksinës së Covid. Kjo me qëllim për të shmangur kalimin e sëmundjes në format e rënda. Sipas drejtueses së ISHP-së, Eugena Tomini, vaksinat ndaj Covid-19 janë falas dhe mund të bëhen pranë çdo qendre shëndetësore lehtësisht nga të gjithë.
“Vaksina është efikase, falas për të gjithë popullatën, kushdo që do të vaksinohet mund ta bëjë në çdo në qendër shëndetësore me një dozë kujtese. E rëndësishme është ta aplikojmë një dozë kujtese sepse vaksina e Covid të mbron, të jep një imunitet dhe zbeh format e rënda të sëmundjes. Çdo moshë mund të paraqitet në qendrat shëndetësore për një vaksinë kujtese. Vaksinimi nuk do të thotë që nuk do prekemi, por që nuk do kemi forma të rënda. Ju lutem vaksinohuni kundër Covid-19, gjendet falas në çdo qendër shëndetësore”, apelon drejtoresha e ISHP-së Eugena Tomini.
p.k\dita
