Gjenevë, 3 Shkurt 2026 – Në Evropë është bërë lajm një gjobë e konsiderueshme e dhënë nga autoritetet zvicerane ndaj një pasagjeri që udhëtoi me avion së bashku me qenin e tij – vetëm pse e nxori jashtë transportuesit dhe e përkëdheli në kabinë.
Ngjarja ndodhi më 20 dhjetor 2024 në një fluturim të kompanisë Swiss nga Zyrihu drejt San Paulos. Pasagjeri – një shtetas gjerman – kishte me vete një qen të vogël të lejuar sipas rregullave të kompanisë, por rregullorja kërkon që qeni të qëndrojë brenda transportuesit të vendosur nën sedilje për gjithë kohëzgjatjen e fluturimit.
Megjithëse fillimisht punonjësit e kabinës i bënë thirrje që ta vendoste sërish qenin në vendin e përcaktuar, ai e liroi kafshën disa herë, përfshirë edhe për ta përkëdhelur – një veprim që shkel rregullat e sigurisë, higjenës dhe respektit për pasagjerët e tjerë.
Për këtë arsye, Ufficio Federale dell’Aviazione Civile (UFAC) i vuri gjobë prej 791 frangash zvicerane (rreth 840 euro).
Kompanitë si Swiss lejojnë qentë e vegjël në kabinë, por me kushtet strikte: ata duhet të qëndrojnë brenda transportuesit të mbyllur gjatë gjithë fluturimit, dhe nuk duhet t’i vendosen në prehër apo në karrige, qoftë edhe për pak kohë.
Autoriteti civil i aviacionit thekson se kjo është e nevojshme për sigurinë e të gjithë pasagjerëve – për shembull për të shmangur shqetësime tek ata që kanë alergji ose frikë nga kafshët.
Ky nuk është rasti i vetëm në Zvicër: një tjetër pasagjere u gjobit me 400 franga për shkak se refuzoi të vendoste qenin e saj në transportues në një fluturim tjetër nën funksion të Swiss/Helvetic.
Autoritetet shprehen se raportimet për shkelje të rregullave të transportit të kafshëve janë rinisur me intensitet vitet e fundit, duke u rritur ndjeshëm. Për shembull, nga 80 shkelje në vitin 2024 ato u rritën në 117 në vitin 2025.
Rregullat qëndrojnë të qarta: dashuria për kafshët nuk e përjashton respektimin e procedurave të sigurisë dhe të rehatisë për bashkëudhëtarët – shkruan Corriere del Ticino
o.p. / dita
