A është ky fundi i romancës siç e kemi njohur?

Nga Migena Aleksi

Në Shqipëri nuk është diskutuar thuajse fare rrjedhja e të dhënave nga aplikacioni i njohur i takimeve “Tea”. Është një ngjarje që ka ngjallur debat në internet, duke u përshkruar nga shumë si një “luftë gjinore” në rritje dhe si simbol i krizës së marrëdhënieve romantike heteroseksuale.

E përmasave të mëdha, kjo rrjedhje nxori në dritë biseda private, përshkrime dhe qëndrime që kanë tronditur përdoruesit.

Por edhe kanë ndezur një reflektim të thellë mbi mënyrën sesi të rinjtë po përjetojnë takimet dhe romancën në epokën dixhitale.

Ajo që e bën këtë më shqetësuese është tendenca që shkon përtej një aplikacioni të vetëm: Studime të shumta, si dhe zëra të fortë në mediat sociale, tregojnë se gjithnjë e më shumë të rinj – si meshkuj ashtu edhe femra – po i largohen marrëdhënieve tradicionale afatgjata.

Lodhja nga përvojat toksike në aplikacionet e takimeve, zhgënjimi nga pritshmëritë e larta dhe mungesa e besimit reciprok po krijojnë një hendek të thellë mes gjinive. Dhe Shqipëria nuk është përjashtim.

Edhe pse shoqëria shqiptare tradicionalisht ka ushqyer vlera të forta familjare, ndryshimi i ritmit të jetesës, ndikimi i rrjeteve sociale dhe përhapja e kulturës globale të dating-ut po ndryshojnë ndjeshëm raportet mes të rinjve.

Aplikacionet si Tinder, Badoo apo së fundmi Tea, janë kthyer në platforma ku marrëdhëniet shpesh ndërtohen mbi sipërfaqe, të shpejta dhe jo rrallë të pasinqerta.

Rrjedhimisht, në vend të një lidhjeje të qëndrueshme, shumë të rinj përjetojnë zhgënjim, pasiguri dhe lodhje emocionale. Ka vajza që ndihen të objektivuara, dhe djem që ndihen të padukshëm. Kjo e shton polarizimin mes gjinive, ku secila palë mendon se është viktimë e tjetrit.

Të dhënat e INSTAT por edhe narrativa e bisedave tregon se një pjesë e të rinjve shqiptarë kanë nisur të përqafojnë një “jetë beqare me vetëdije”, ndërsa të tjerë e kanë humbur në.masë besimin tek ideja e dashurisë.

Nga njëra anë kemi ndjesinë se marrëdhëniet janë lodhje dhe shterpësi emocionale, nga ana tjetër mungon një kulturë e sinqertë komunikimi, mirëkuptimi dhe investimi emocional.

A është ky fundi i romancës siç e kemi njohur?

Ndodhta ende jo domosdoshmërisht. Por është me siguri një thirrje e fortë për reflektim. Nëse nuk ndryshojmë mënyrën si lidhemi, si i trajtojmë marrëdhëniet, si flasim për ndjenjat dhe pritshmëritë, atëherë “lufta gjinore” do thellohet edhe më shumë – dhe dashuria do mbetet thjesht një fjalë romantike për në këngë e poezi.

Botuar në DITA