Në asnjë moment unë nuk jam shprehur kundër detyrimit të bashkisë për të mbështetur të rinjtë e komunitetit LGBTQ+, të cilët vuajnë diskriminimin në punë, në shkollë dhe në shoqëri. Qëndrimi im lidhej me administrimin e informacionit nga bashkia, pasi bonusi është caktuar të jepet vetëm kur personat deklarojnë në formular nëse i përkasin komunitetit LGBTI.
Në këtë pikë unë kam shprehur shqetësimin se bashkia nuk duhet të mbajë një databazë të preferencave seksuale të qytetarëve. Së pari, unë besoj që këto çështje janë thellësisht private dhe nuk i takojnë shtetit. Së dyti, është e rrezikshme kur ky informacion mblidhet nga një shtet me tendenca autoritare, dhe që është i ekspozuar nga sulmet kibernetike. Së treti, bashkia do vazhdojë të mos përmbushë detyrimet e veta ndaj atyre të rinjve që për shkak të presionit dhe mosbesimit ndaj shtetit, nuk do të mundet të shprehin publikisht përkatësinë e tyre në këtë komunitet.
Këtë qëndrim e kam sqaruar me zë dhe me figurë gjatë deklaratës time publike përpara bashkisë, me datë 8 tetor 2024, ku kam thënë “nëse qytetari i deklaron bashkisë preferencat e veta seksuale, ngjitet në renditje”. Në kontekstin e shpjeguar më sipër bëhet e qartë që kundërshtimi ka qënë për mënyrën e realizimit dhe jo objektivin për të mbështetur komunitetin LGBTI. Nëse gazetari do të kishte bërë pak punë kërkimore, do ta kishte gjetur këtë qëndrim të sqaruar edhe në postimin e datës 13 Tetor 2024 në faqen time në Facebook, ku e kam rikthesuar si më poshtë:
“Por dua të jem i qartë: kjo nuk ka të bëjë fare me detyrimin e bashkisë për të mbrojtur të rinjtë e komunitetit LGBTQ+, të cilët vuajnë diskriminimin në punë, në shkollë dhe në shoqëri. Kam parë personalisht raste ku të rinj nga ky komunitet janë dëbuar nga shtëpitë e tyre, dhunuar verbalisht dhe fizikisht, dhe janë përballur me dëmtime të tmerrshme vetëm për shkak të jetës së tyre private. Një dhunë e tillë është e papranueshme dhe unë do vazhdojë të mbështes çdo përpjekje për t’u kujdesur për këta të rinj, si dhe çdo i ri tjetër që diskriminohet për shkak të ngjyrës, statusit social, apo preferencave seksuale. Askush nuk duhet të jetojë me frikë vetëm sepse i përket një minoriteti.” (qëndrimi plotë https://www.facebook.com/share/p/XvKNPGbZmU21qLYh/) Duke shpresuar se ju nuk do të lejoni keqinformimin e audiencë suaj, po ju dërgoj këtë sqarim.
