Kryetarja e Komisionit Hetimor për Koncesionet në Shëndetësi, Albana Vokshi u “përplas” verbalisht me deputetin e PS-së, Plarent Ndreca.
Vokshi tha se duhet që të lexohen të dyja planet e të dyja palëve dhe të vendoset deri të enjten një plan i përbashkët. Ndërsa, Ndreca nënvizoi se ekspertët duhet të bien dakord. Ndërkohë, Ilir Metaj, i është përgjigjur me ironi kryetares Albana Vokshi.
Replikat:
Plarent Ndreca: Ja plani hetimor. Ja ku është kalendari. Ky është kalendari i punës të Planit Hetimor. Ka plan Hetimor të Komisionit, Komisionet e përhershme kanë plane pune. dakord për planin.
Albana Vokshi: Ju e lexoni ligjin siç doni vetë. Do të njihet publiku me planin. Çfarë halli keni, pse po fshiheni? Të lexohet plani ynë dhe juaji dhe të enjten të diskutohen të dyja palët. Kërkesat janë dakordësuar.
Plarent Ndreca: Fryma e ligjit konsideron se ekspertët bien dakord për një plan hetimor. Ne nuk kemi publikuar planin hetimor në respekt të punës së ekspertëve. Ekspertët duhet të bien dakord për planin. Të lexohen planet dhe pas 1 apo disa ditësh thjesht të votojmë.
Albana Vokshi: Çfarë janë këto? Do bëheni serioz? Komisionin e thërras dhe e drejtoj unë. Jo nuk ta jap fjalën!
Petro Koçi kërkon fjalën, Albana Vokshi ja jep fjalën Ilda Dhorit. Ka debate pa mikrofon.
Pas Ilda Dhorit, fjalën e merr deputeti i PS Ilir Metaj:
Ilir Metaj: Këtu jemi në komisionin hetimor të shëndetësisë, nuk jemi në “ Albana Vokshi Fun Club”. Të paktën ne nga ana këtej e tavolinës nuk e pranojmë rolin e qënies thjesht statistikë në skenarin e parashkruajtur nga ju.
Edhe Hegeli do duartrokiste dhuntinë tuaj për të bashkuar Tezën me Antitezën e rregullores për të prodhuar Sintezën e rregullores me vetëm sugjestionet që ju pëlqejnë juve.
Sigurisht që ju do donot që koha e punës së komisionit të mos mbushej me opinionet tona, po vetëm me zhurmën e artikuluar të zërit tuaj, po nuk funksionon kështu. Harroje!”
b.m/dita
