Është shoqëruar me debate dhe replika të forta seanca e sotme plenare, teksa edhe këtë të enjte ministrja e Bujqësisë, Frida Krifca, ishte në interpelancë me deputetin socialist, Erion Braçe.
Ky i fundit ka vijuar akuzat e forta ndaj qeverisë, lidhur me situatën ku ndodhet bujqësia shqiptare, duke e cilësuar atë një situatë aspak normale, por sipas tij, të jashtëzakonshme.
BRAÇE: Tregtari po merr shumë, janë ato shifrat që shikoni, merr 2-3 më shumë se bujku. Bujku nuk ka për të kuptuar kurrë, paratë e tij i merr prodhuesi. I merr grumbulluesi. Kjo është bujqësia që po vjen, bujqësia sipërmarrëse, e përqendruar te 100 sipërmarrës të mëdhenj, që shpërndajnë rroga minimale të bujqit. Kjo nuk është normale, është e jashtëzakonshme. Në një botë tjetër, Mehmet Shehu e quajti monopolizim”, u shpreh deputeti i PS.
KRIFCA: Janë ngritur 24 grupe të përbashkëta monitorimi që të riverifikohen lista dhe në terren. Deri tani ka mbaruar verifikimi në 7 qarqe dhe po vijon në qarqe të tjera, brenda vjeshtës do bëjmë publike një platformë të re ku informacioni do jetë i integruar në një hartë dixhitale. Aktualisht 52 kontrata qiramarrje kur 3 prej tyre për shkelje të kontratës është kërkuar zgjidhje kontrate që janë goditur në gjykatë.
BRAÇE: Ju kujtoj që unë nuk punoj në ministri, punoj në Parlament. Unë që të jeni e qetë, nuk do punoj asnjëherë në atë ministri. Patjetër që ndërtimi i rrjetit të grumbulluesve është një e mirë, por duhet të ishte e mirë publike dhe jo e drejtë private. Çmimi i shalqirit sot është më pak se një vit më parë. Bujqit i shihni në një varësi deri diku shkon në skllavëri. Karteli i grumbulluesve po i bën gjëmën bujqve. Tani duhet të rishikojmë kontratat me ta. Megjithë përmirësimet dixhitale që lajmëruat këtu, jemi në kushte primitive. Nuk shitet shalqiri me telefon. Mos i bëni këto me mesazhe, se ato vijnë te unë.
KRIFCA: Sa i takon kontratave, janë të lidhura nga 2013 deri në 2020. Mos kini asnjë dyshim se nuk kam asnjë kontratë të lidhur nën tavolinë. Nuk çoj njeri në terren për të parë a ka toka të lira. Kontratat nuk prishen me një vendim të thjeshtë, sepse një vendim i tillë është goditur nga gjykatat. Kontratat që shikoni si deputet mund ti sillnit në zyrën time dhe t’i hulumtonim së bashku. Në lidhje me marrëdhënien grumbullues, tregtar dhe fermer e cila është një marrëdhënie e shenjtë, ju keni qenë zv.kryeministër dhe e keni promovuar këtë politikë, nuk mund ti shkojmë dot kundër sot. Kjo marrëdhënie patjetër ka nevojë për më shumë transparencë. Ministria ka në dispozicion vetëm instrumentet e tregut të lirë. Mund të punojmë bashkërisht që ta përmirësojmë këtë politikë, por nuk mund ti shkojmë kundër.
o.j/dita
